काठमाडौं– नेपाली कांग्रेसका नेता डा. शेखर कोइरालाले पार्टीको आधिकारिक नेतृत्वसँग संवाद भए कांग्रेसभित्र देखिएको विवाद समाधान गर्न सकिने बताएका छन्।

शुक्रबार बिहान विराटनगरस्थित आफ्नै निवासमा महामन्त्री गुरुराज घिमिरेसँग भएको भेटमा उनले पार्टीभित्रको गतिरोध अन्त्य गर्न नेतृत्व तहमा औपचारिक छलफल आवश्यक रहेको धारणा राखेका हुन्।

महामन्त्री घिमिरेले पनि सभापति र पार्टीको आधिकारिक टोलीसँग छलफल भए अहिले देखिएको विवाद समाधान गर्न कठिन नहुने बताएका छन्।

भेटका क्रममा पार्टीभित्रका विवाद समाधान, १५औँ महाधिवेशनमा सबै पक्षको सहभागिता सुनिश्चित गर्ने वातावरण र कोइराला पक्षका पाँच तथा संस्थापन पक्षका सात प्रस्तावलाई कसरी टुंगोमा पुर्‍याउने भन्ने विषयमा पनि छलफल भएको घिमिरेले बताए ।

भारत भ्रमणबाट फर्किएलगत्तै घिमिरे कोइरालालाई भेट्न पुगेका हुन्।