काठमाडौं – राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत पदाधिकारी चयन प्रक्रियामा महामन्त्री पदका लागि प्रमोद न्यौपानेले उम्मेदवारी दिएका छन्। अर्कोतर्फ, पार्टी सभापति रवि लामिछानेका निकट मानिने दीपक बोहराले भने कुनै पनि पदाधिकारी पदमा उम्मेदवारी दिएका छैनन्।

पार्टीभित्रको प्रारम्भिक छलफलमा बोहराले महामन्त्री वा सहमहामन्त्रीमध्ये कुनै एक पदमा उम्मेदवारी दिने चर्चा भए पनि अन्ततः उनले कुनै पदका लागि मनोनयन दर्ता गरेनन्।

स्रोतका अनुसार सुरुमा प्रमोद न्यौपानेलाई पार्टीको प्रवक्तामा मनोनित गर्ने तयारी थियो। तर उनले निर्वाचनमार्फत नेतृत्वमा पुग्ने इच्छा व्यक्त गरेपछि महामन्त्री पदमा उम्मेदवारी दिएका हुन्।

यससँगै, पार्टीले दीपक बोहरालाई प्रवक्ताको जिम्मेवारी दिने सम्भावना बढेको स्रोतको दाबी छ। यस विषयमा पार्टी नेतृत्वबीच छलफल जारी रहेकाले औपचारिक निर्णय भने सार्वजनिक गरिएको छैन।

दीपक बोहरा हालसम्म सरकारमा मन्त्री, संसदीय समिति वा अन्य कुनै प्रमुख जिम्मेवारीमा नरहेकाले उनलाई पार्टीको प्रवक्ताको भूमिकामा ल्याउने सम्भावनालाई बलियो रूपमा हेरिएको पार्टी स्रोतले जनाएको छ।