काठमाडौँ – पत्रकार विनोद ढकाललाई प्रहरीले पक्राउ गरेको छ। उनलाई प्रहरी वृत्त नयाँ बानेश्वरको टोलीले साइबर क्राइमको मुद्दामा काठमाडौंबाट नियन्त्रणमा लिएको हो।

क्यानडा नेपाल डटकमसहित विभिन्न सञ्चारमाध्यममा सम्बद्ध रहेका ढकालले आफ्नो फेसबुक अकाउण्टमार्फत् प्रहरी प्रमुख दानबहादुर कार्की तथा इटहरी उपमहानगरपालिकाका मेयर हेमकर्ण पौडेलविरुद्ध विभिन्न टिप्पणी सार्वजनिक गरेका थिए। सोही विषयलाई लिएर उनका विरुद्ध इलाका प्रहरी कार्यालय, इटहरीमा जाहेरी दर्ता भएको थियो।

नयाँ बानेश्वर प्रहरी वृत्तका अनुसार सुनसरी जिल्ला अदालतबाट जारी भएको पक्राउ पुर्जीका आधारमा उनलाई पक्राउ गरिएको हो। अदालतबाटै अनुमति लिएर नियन्त्रणमा लिइएकाले उनलाई थप अनुसन्धानका लागि सुनसरी पठाइएको प्रहरीले जनाएको छ।