काठमाडौं – गायक अर्जुन सुनारको नयाँ गीत ‘कर्णाली तिर’को ट्रिजर सार्वजनिक गरिएको छ। रोजगारीको खोजीमा गाउँ, परिवार र जन्मथलो छाड्न बाध्य नेपाली युवाको यथार्थलाई केन्द्रमा राखेर तयार गरिएको ट्रिजरले कर्णाली क्षेत्रको सामाजिक तथा आर्थिक अवस्थासँगै त्यसले निम्त्याएको पारिवारिक विछोडको पीडालाई चित्रण गरेको छ ।

सार्वजनिक ट्रिजरमा कर्णालीका पहाडी गाउँ, ग्रामीण जनजीवन तथा अभावबीच संघर्षरत परिवारको कथा प्रस्तुत गरिएको छ । आर्थिक समस्याका कारण गाउँमै भविष्य नदेखेपछि घर छाड्न बाध्य एक युवकको कथालाई मुख्य विषय बनाइएको छ ।

मुख्य भूमिकामा रहेका अर्जुन सुनारले परिवारको आर्थिक अवस्था सुधार्ने उद्देश्यले श्रीमती र सानो सन्तानलाई छाडेर बाहिरिनुपर्ने पात्रको भूमिका निर्वाह गरेका छन् । राज्य लक्ष्मी नेपालीले उनकी श्रीमतीको भूमिका निभाएकी छन् ।

ट्रिजरमा श्रीमान्–श्रीमतीबीचको आत्मीय सम्बन्ध, बाध्यात्मक बिछोड र प्रतीक्षाको पीडालाई भावनात्मक ढंगले प्रस्तुत गरिएको छ । कर्णाली नदी आसपासका दृश्य, सुनसान परिवेश तथा रित्तिँदै गएका घरआँगनमार्फत गाउँबाट हुने युवापलायनले परिवार र समाजमा पार्ने असर देखाउने प्रयास गरिएको छ ।

भिडियोमा कर्णाली क्षेत्रको मौलिक संस्कृति, पहिरन र भौगोलिक विशेषतालाई समेत समेटिएको छ । गीतको निर्देशन आयुष शाहीले गरेका हुन् । कथा राजेश विश्वकर्माको रहेको भिडियोको छायांकन प्रकाश विश्वले गरेका छन् । दुर्गा रावत निर्माता रहेको भिडियोको सम्पादन मदन नेपालीले गरेका हुन् ।

बेरोजगारी, अभाव र गाउँबाट हुने युवापलायनजस्ता विषय उठान गरिएको ‘कर्णाली तिर’को पूर्ण भिडियो आगामी जेठ १६ गते सार्वजनिक गरिने गायक सुनारले जानकारी दिएका छन् । ट्रिजरले ग्रामीण नेपालको प्रतिनिधिमूलक कथा प्रस्तुत गर्ने संकेत गरेको सम्पादक मदन नेपालीले बताएका छन् ।