काठमाडौं- पर्साको वीरगञ्जबाट गत जेठ ५ गते राति पक्राउ परेका मेडिकल व्यवसायी दुर्गा प्रसाईंलाई जिल्ला अदालतले साधारण तारेखमा छाड्न आदेश दिएको छ।

वीरगञ्जस्थित होटल सिद्धार्थ दियालोबाट नियन्त्रणमा लिएर जिल्ला प्रहरी कार्यालय पर्साको हिरासतमा राखिएका उनलाई मंगलबार अदालतले साधारण तारेखमा छाड्न भनेको हो।

विद्युतीय कारोबार र राज्यविरुद्धको कसूर अभियोगमा मुद्दा चलाइएका उनलाई न्यायाधीश गायत्रीप्रसाद रेग्मीको एकल इजलासले साधारण तारेखमा छाड्न आदेश दिएको हो ।

सामाजिक सञ्जालमार्फत् उत्तेजक अभिव्यक्ति दिएको, सामाजिक सद्भाव बिगार्ने गतिविधि गरेको र राज्यविरुद्ध उक्साउने गतिविधिमा संलग्न रहेको उजुरीका आधारमा उनलाई पक्राउ गरिएको प्रहरीले जनाएको थियो । तर प्रहरीको उक्त दाबी पुष्टि हुने कुनै आधार नभेटिएको निष्कर्ष अदालतले निकालेको छ।

‘माथिको आदेश’ भन्दै प्रहरीले उनलाई पक्राउ गरेको थियो । प्रसाईं यसअघि केपी शर्मा ओली र सुशीला कार्की नेतृत्वको सरकारको निशानामा परिरहन्थे। अब वालेन्द्र शाहले पनि पनि उनका गतिविधिमा नियन्त्रण गर्न थालेका हुन् । तर वालेन्द्र नेतृत्वको सरकाले हिरासतमा लगे पनि उनीमाथिको अभियोग पुष्टि गर्न सकेनन् ।

‘राष्ट्र, राष्ट्रियता धर्म संस्कृति र नागरिक बचाउन महाअभियान नेपाल’का संयोजक रहेका प्रसाईं एक कार्यक्रममा सहभागी हुन वीरगन्ज पुगेका थिए । उक्त कार्यक्रमको तयारीका लागि होटलमा जुटेका बेला उनलाई प्रहरीले उठाएको थियो ।

सर्वोच्च अदालतले पनि प्रसाईंलाई थप हिरासतमा नराख्न आदेश दिएको थियो । थपिएको म्यादभित्रै अनुसन्धान टुंग्याएर मुद्दा लैजान सर्वोच्चले भनेको थियो । दोस्रो म्याद आइतबार सकिएसँगै मुद्दा अदालत लानैपर्ने बबामा प्रहरी थियो । त्यही भएर सोमबार उनीविरुद्ध मुद्दा चलेको थियो ।

उनले यसअघि आफूलाई गैरकानुनी थुनामा राखिएको भन्दै उनको तर्फबाट दायर बन्दी प्रत्यक्षीकरणको रिटमा सर्वोच्च अदालतका न्यायाधीश विनोद शर्मा र नित्यानन्द पाण्डेयको इजलासले म्याद थप नगर्न सरकारका नाममा परमादेश दिएका थिए।