काठमाडौं- सभामुख डोलप्रसाद अर्यालले प्रधानमन्त्री वालेन्द्र शाह संसद्मा आएर जवाफ दिने तयारीमा रहेको बताएका छन्।

आगामी आर्थिक वर्षको बजेट आउनुअघि मंगलबार बसेको संसद् बैठकमा पनि प्रधानमन्त्री नआएपछि विपक्षी दलहरूले अवरोध जारी राखेपछि सभामुखले यस्तो बताएका हुन् ।

‘स्वयम् सरकार र प्रधानमन्त्रीसँग पनि मेरो संवाद भइरहेको छ। प्रधानमन्त्री संसद्मा आउने तयारी गरिरहुन भएको छ’, उनले भने, ‘अहिले सदनमा भइरहेको विषयमा प्रधानमन्त्री जानकार हुनु हुन्छ।’

उनले सत्ता पक्ष (राष्ट्रिय स्वतन्त्र पार्टी) का सचेतक कविन्द्र बुर्लाकोटीले पनि प्रधानमन्त्रीले सदनमा आएर जवाफ दिने तयारी गरिरहेको बताएको उल्लेख गरे।

मंगलबारको बैठकमा विपक्षीको अवरोधबीच मन्त्रीलाई बोल्ने समय सभामुखले दिएका थिए । तर सबै विपक्षीले मोर्चाबद्ध गरेर संसद्मा अवरोध जारी राखेका छन्।

त्यसअघि कांग्रेसकी प्रमुख सचेतक बासना थापाले प्रधानमन्त्रीलाई सदनमा ल्याउन सभामुखसमक्ष रुलिङका लागि आग्रह गरेकी थिइन् । तर सभामुख अर्याल प्रधानमन्त्रीका नाममा रुलिङ गर्नबाट पन्छिरहेका छन्।