काठमाडौं- नेकपाका प्रमुख सचेतक युवराज दुलालले समाचार लेखेकै आधारमा पत्रकारमाथि जाइलाग्ने सरकारी शैलीको आलोचना गरेका छन्।

मंगलबार बसेको संसद् बैठकमा समय लिएर बोल्दै दुलालले २४ घण्टायता एकजना पत्रकारलाई सरकारले गर्न खोजेको धरपकडप्रति गम्भीर आपत्ति जनाए ।

‘गएको २४ घण्टा देशका एकजना स्थापित पत्रकारलाई सरकारले गिरफ्तार गर्दैछ भन्ने कुरा भाइरल भइरहेको छ। समाचार लेखेकै आधारमा पत्रकारलाई आतंकित बनाउने काम सरकारले बन्द गरोस्’, उनले भने, ‘सरकारको यस कदमले सर्वसाधारणमा पनि संशय पैदा भएको छ। पत्रकारले सरकारको खबरदारी गर्न सक्छन्, गर्न पाउनुपर्छ ।’

उनले वरिष्ठ पत्रकार किशोर श्रेष्ठलाई सरकारले नै गरेको खेद्ने प्रयासको निन्दा गरे । ‘पत्रकार श्रेष्ठलाई जुन स्तरमा समाचार लेखेको नाममा खेद्ने काम भएको छ, यो गलत छ’, उनले भने ‘यदि पत्रकारले लेखेको समाचार गलत भए प्रेस काउन्सिल छ, उसैले कारबाही गर्न सक्छ। तर सरकार नियोजित रुपमा पत्रकारलाई खेद्न लाग्नु गलत छ।’

उनले प्रकाशित समाचार गलत भए नियमन गर्ने काम प्रेस काउन्सिलको क्षेत्राधिकारमा पर्ने स्मरण गराउँदै दुलालले राज्य शक्तिको दुरुपयोग नगर्न भने ।