काठमाडौं- विभिन्न पाँचभन्दा धेरै सहकारीको अर्बौँ रुपैयाँ अपचलनपछि फरार राष्ट्रिय स्वतन्त्र पार्टीका सभापति रवि लामिछानेका साझेदार गितेन्द्रबाबु राई (जीबी) बारे संसद्मा प्रश्न उठेको छ।

रवि र जीबीले मिलेर सञ्चालन गरेको गोर्खा मिडिया नेट्वर्कका नाममा दुईजनासहितले अर्बौँ रुपैयाँ हिनामिना गरेको मुद्दा अहिले अदालतमा विचाराधीन छ।

उता कास्की जिल्ला अदालतमा रहेको संगठित अपराध र सम्पत्ति शुद्धीकरण मुद्दाबाट यी दुवैजनालाई राहत मिलिसकेको छ।

गम्भीर अपराधबाट चोख्याउने काम भइरहँदा सोमबार बसेको संसद् बैठकमा श्रम संस्कृति पार्टीका सांसद आरेन राईले जीबी राईबारे सरकारलाई प्रश्न गरेका छन् । अहिले रास्वपाको शक्तिशाली सरकार रहेका बेला पनि जीबी पक्राउ पर्ने टुंगो नभएको बताउँदै उनले संसद्‍बाट प्रश्न गरेका हुन् ।

प्रतिनिधि सभाको बैठकको शून्य समयमा सांसद राईले बोल्दै सहकारी ठगीमा परेकाहरूलाई राहत दिनुपर्ने पनि बताए । तर रहातका नाममा सरकारी ढुकुटी रित्याउन नहुने पनि उनले बताएका छन् ।

राईले बाँदर व्यवस्थापनसहितका मुद्दा पनि आफ्ना भनाइ राखे । ‘बाँदर व्यवस्थापन कहिले हुन्छ सरकार ? सुकुम्वासी र अव्यवस्थित बसोबासीलाई सरकार छ भन्ने अनुभूत हुने गरी व्यवस्थापन कहिले हुन्छ सरकार ?’, उनले सोधे, ‘जीबी राई कहिले पक्राउ पर्छन् सरकार ?’