कोलकाता – इन्डियन प्रिमियर लिग (आईपीएल) २०२६ अन्तर्गत ३८औँ खेलमा कोलकाता नाइट राइडर्सले लखनउ सुपर जायन्ट्सलाई १५६ रनको लक्ष्य दिएको छ ।

एकाना क्रिकेट मैदानमा पहिले ब्याटिङ गरेको कोलकाताले २० ओभरमा ७ विकेट गुमाउँदै १५५ रन बनाएको हो ।
कोलकाताको सुरुवात अत्यन्त कमजोर रह्यो। टोलीले ९३ रन बनाउँदा नै ७ विकेट गुमाइसकेको थियो । यस्तो दबाबपूर्ण अवस्थामा रिंकू सिंहले उत्कृष्ट प्रदर्शन गर्दै टोलीलाई उकासे ।

उनले ५१ बलमा ८३ रन बनाउँदै आफ्नो लिग करियरकै सबैभन्दा ठूलो इनिङ खेले । उनको इनिङमा ७ चौका र ५ छक्का समावेश थिए। विशेषगरी अन्तिम ओभरमा लगातार ४ छक्का प्रहार गर्दै उनले टोलीलाई सम्मानजनक स्कोरसम्म पुर्‍याए । यसैगरी क्यामरन ग्रीनले ३४ रनको योगदान दिए भने अन्य ब्याट्सम्यानले अपेक्षाअनुसार प्रदर्शन गर्न सकेनन् ।

लखनउका लागि मोहसिन खान सर्वाधिक सफल बलर सावित भए । उनले ५ विकेट लिँदै कोलकाताको ब्याटिङ लाइनअप ध्वस्त पारे । उनले क्यामरन ग्रीन, अनुकूल रोय, रोवम्यान पावेल, टिम साइफर्ट र अजिंक्य रहाणेलाई आउट गरे । त्यस्तै रमन्दीप सिंहलाई जर्ज लिन्डेले पवेलियन फर्काए ।

खेलमा एउटा दुर्लभ घटना पनि देखियो। कोलकाताका अंगकृष रघुवंशी ‘फिल्डमा अवरोध गरेको’ कारण आउट घोषित भए। रन लिने क्रममा थ्रो उनको शरीरमा लागेपछि अम्पायरले उनलाई जानाजानी बलको बाटोमा आएको ठहर गर्दै आउट दिएका हुन् ।