काठमाडौं – काठमाडौंबाट झापा जान गायिका रचना रिमाल चढेको विमान जनकपुरमा अवतरण भएको छ ।

मौसमको खराबीका कारण विमान डाइभर्ट गरी जनकपुरमा अवतरण गरिएको हो । रचना आइतबार झापा जान बुद्ध एयरको विमान चढेकी थिइन् ।

दोस्रो प्रयासमा पनि झापा पुग्न नपाएपछि उनले सामाजिक सञ्जालबाटै यसबारे जानकारी दिएकी हुन् ।

शनिबार पनि उनी झापा पुग्न पाइनन् । शनिबार दिउँसो २ बजे उडेको विमान केही समयमै काठमाडौंंमै फर्किएको थियो । उक्त घटना पनि उनले सेयर गरेकी छन् ।

उनले लेखेकी छन्, ‘हिजो झापा जाँदै गरेको गर्दा मौसम खराबीका कारण उडेको केही समयपछि प्लेन काठमाडौंमा फर्कियो ।’

दुई दिन नै मौसमले साथ नदिँदा झापा समयमा पुग्न नपाएको उनले बताएकी छन् ।

आजको घटनाबारे उनले भनेकी छन्, ‘बिहान ५ बजे नै उठेर हिँडेको जनकपुर पो आइपुगियो ।’

विमानस्थल परिसरबाट उनले भिडियो पनि सार्वजनिक गरेकी छन् । अब सडकमार्गबाट झापा पुग्ने बताएकी छन् ।

उनको भिडियोमा पानी परिरहेको र बिहान ९ बजे नै साँझको अँध्यारो जस्तो देखिन्छ ।