वासिङ्टन – होटल बाहिरको सडक दर्जनौँ प्रहरी गाडी र सुरक्षा सवारीले भरिएको छ। पुलिसका गाडीले सडक बन्द गरेका छन् भने आकाशमा हेलिकप्टरले गस्ती गरिरहेका छन्। विश्वभरका सञ्चारमाध्यमका प्रतिनिधि होटल बाहिर क्यामरासहित उभिएर घटनाको प्रत्यक्ष प्रसारण गरिरहेका छन्।

भित्र कार्यक्रम चल्दाचल्दै गोली चलेपछि सुरक्षा निकायले हल खाली गराएको थियो। राष्ट्रपति ट्रम्पले आफू सुरक्षित रहेको र सुटर पक्राउ परेको जानकारी दिइसके पनि सुरक्षा संवेदनशीलतालाई ध्यानमा राख्दै पूरै क्षेत्रलाई अहिले सिल गरिएको छ।

घटनालगत्तै राष्ट्रपति डोनाल्ड ट्रम्पको मोटरकेड कडा सुरक्षाका बीच ह्वाइट हाउसतर्फ प्रस्थान गरेको छ।

अहिले होटल बाहिरको दृश्य निकै तनावपूर्ण र भावुक देखिएको छ। होटलबाट बाहिरिने क्रममा जताततै ठूलो संख्यामा प्रहरी र सुरक्षाकर्मीको उपस्थिति छ। होटल बाहिर निषेधित क्षेत्र घोषित गरिएको छ । सर्वसाधारण र सहभागीलाई सुरक्षित दूरीमा राखिएको छ। त्यहाँ भेला भएका मानिसहरू आफ्ना आफन्त र साथीभाइ सुरक्षित भए नभएको सोधखोज गर्दै अंकमाल गरिरहेका छन्।