काठमाडौं- राष्ट्रिय प्रजातन्त्र पार्टी संसदीय दलका नेता ज्ञानेन्द्र शाहीले सुशासनका पक्षमा आफ्नो अडान स्पष्ट राखेका छन् ।

बिहीबार सांसद पदको शपथ ग्रहणपछि पत्रकारसँग बोल्दै उनले भ्रष्टाचारविरुद्ध सशक्त रूपमा उभिने प्रतिबद्धता जनाए ।

उनले मुलुकमा विधिको शासन स्थापना गर्न सरकारलाई आफ्नो तर्फबाट पूर्ण सहयोग रहने बताए।

यसका साथै, वाइडबडी विमान खरिद प्रकरण, एनसेल फोरजी कर विवाद, मेलम्ची खानेपानी आयोजना र सुनकाण्डजस्ता ठूला भ्रष्टाचारका घटनामा निष्पक्ष छानबिन गर्नुपर्नेमा उनले जोड दिए ।

शाहीले यस्ता गम्भीर प्रकरणमा सत्यतथ्य बाहिर ल्याउन आफूहरू सदैव तयार रहेको उल्लेख गरे ।

भ्रष्टाचारविरुद्ध कडा रूपमा उभिने पनि उनले बताएका छन् । सुशासनको पक्षमा दृढ रहँदै भ्रष्टाचारलाई खबरदारी गर्न आफूहरूको भूमिका सक्रिय रहने शाहीले स्पष्ट पारे।

उनले अब देशमा पारदर्शिता, जवाफदेहिता र विधिको शासन कायम गर्न सबै पक्षको सहकार्य आवश्यक रहेको पनि बताए ।