आबु धाबी- संयुक्त अरब इमिरेट्स (यूएई) को राजधानी आबु धाबीमा बिहीबार बिहान ब्यालिस्टिक क्षेप्यास्त्रको भग्नावशेष खस्दा दुई जनाको मृत्यु भएको छ । सुरक्षा बलले इरानबाट प्रहार गरिएको क्षेप्यास्त्रलाई आकाशमै सफलतापूर्वक नष्ट गरेको थियो ।

तर, त्यसको टुक्राहरू भुइँमा खस्दा दुई जनाको ज्यान जानुका साथै अन्य तीन जना घाइते भएका छन् । आबु धाबीको स्विहान सडकमा भएको घटनामा केही सवारी साधनहरूमा समेत क्षति पुगेको छ ।

यूएईको रक्षा मन्त्रालयले आफ्ना हवाई रक्षा प्रणालीले इरानबाट आएका क्षेप्यास्त्र र ड्रोनहरूलाई विफल पारेको पुष्टि गरेको छ । बुधबार मात्रै यूएईको रक्षा प्रणालीले नौवटा ड्रोनहरूलाई बीचैमा रोकेको थियो ।

पश्चिम एशियामा द्वन्द्व चर्किँदै जाँदा हालसम्म यूएईले ३५७ ब्यालिस्टिक क्षेप्यास्त्र, १५ क्रुज क्षेप्यास्त्र र १,८१५ वटा ड्रोनहरूलाई सफलतापूर्वक निष्क्रिय पारिसकेको छ । आक्रमणका कारण हालसम्म यूएईमा ११ जनाले ज्यान गुमाइसकेका छन् भने १ सय ६६ जना घाइते भएका छन् ।

अधिकारीहरूले सर्वसाधारणलाई आधिकारिक स्रोतबाट आएका समाचारमा मात्र विश्वास गर्न र अफवाह नफैलाउन आग्रह गरेका छन् ।