इस्तानबुल– रुसबाट १ लाख ४० हजार टन कच्चा तेल बोकेर आएको टर्कीको ‘अल्टुरा’ नामक जहाज ड्रोन आक्रमणमा परेको छ । स्थानीय सञ्चार माध्यम एनटिभीका अनुसार इस्तानबुलको बोस्फोरस स्ट्रेटबाट करिब २४ किलोमिटर टाढा कृष्ण सागरमा घटना भएको हो ।

ठूलो विष्फोटका कारण जहाजको मुख्य नियन्त्रण कक्ष र इन्जिन कोठामा गम्भीर क्षति पुगेको छ । इन्जिन कक्षमा पानी पस्न थालेपछि जहाजले आपतकालीन संकेत पठाएको थियो । त्यसलगत्तै टर्कीको तटरक्षक बल र आपतकालीन टोलीहरू उद्धारका लागि घटनास्थलमा पुगेका थिए ।

जहाजमा सवार २७ जना चालक दलका सदस्यहरू सबै टर्कीका नागरिक हुन् । उनीहरू सबै सुरक्षित रहेको र कसैलाई पनि चोट नलागेको बताइएको छ ।

हाल घटनास्थलमा उद्धार कार्य जारी छ । यो आक्रमण कसले र किन गरेको हो भन्नेबारे टर्कीका अधिकारीहरूले अहिलेसम्म कुनै आधिकारिक जानकारी दिएका छैनन् ।