काठमाडौं– नयाँ सांसदहरूको शपथपछि राष्ट्रिय स्वतन्त्र पार्टी (रास्वपा) ले आजै केन्द्रीय समिति र संसदीय दलको बैठक बोलाएको छ।

बिहीबार दिउँसो ४ बजे बस्ने केन्द्रीय समिति बैठकले बालेन्द्र शाहलाई प्रधानमन्त्री बनाउने गरी पार्टी विधान संशोधन गर्ने कार्यतालिका तय गरिएको छ।

त्यसपछि ५ बजे संसदीय दलको बैठक बसेर संसदीय दलको नेता चयन गरिनेछ।

पार्टी कोषाध्यक्ष लिमा अधिकारी का अनुसार संसदीय दलको बैठकबाट शाहलाई दलको नेता चयन गर्ने तयारी गरिएको छ।

‘अपराह्न ४ बजे केन्द्रीय कमिटी बैठक बस्छ र हाम्रो वरिष्ठ नेता बालेन्द्र शाहलाई संसदीय दलको नेता बनाउने विधान संशोधन गर्छ। लगत्तै संसदीय दलको बैठक बसेर उहाँलाई संसदीय दलको नेता बनाइन्छ,’ अधिकारीले भनिन्।

उनले आज दलको नेता बनेपछि भोलि प्रधानमन्त्रीको शपथ लिने बताइन् ।

‘आजै संसदीय दलको पहिलो बैठक बस्छ र भोलि बालेन्द्रजीले प्रधानमन्त्रीको रूपमा शपथ ग्रहण गर्नुहुन्छ’, उनलेे भनिन् ।

संसदीय दलको नेता चयन भएपछि शाहले बैठकलाई सम्बोधन गर्ने कार्यतालिका पनि तय गरिएको छ।