दोलखा– दोलखामा निर्वाचन नजिकिँदै आएसँगै पछिल्ला दिनहरूमा पार्टी छाड्ने र प्रवेश गर्नेहरूको लर्को लाग्न थालेको छ ।

बिहीबार कांग्रेस वैतेश्वरले आयोजना गरेको चुनावी सभामा दर्जनौँ एमाले र पूर्व माओवादी पार्टी छोड्नेको लर्को लागेको थियो ।

 मैनापोखरीमा आयोजना गरेको चुनावी सभामा झण्डै एक २० जना कार्यकर्ताले आफू आबद्ध पुरानो दलको सदस्यता त्याग गर्दै नेपाली कांग्रेस प्रवेश गरेका छन् । 

दसौँ वर्ष एमाले र माओवादीमा रहँदा आफूहरूका माग र आवश्यकता पुरा गर्न कम्युनिस्ट पार्टीले नसकेपछि बाध्य भएर पार्टी फेरेको वैतेश्वर-२ का पुराना कम्युनिस्ट एमाले कार्यकर्ता गोपाल तामाङले बताए ।

कांग्रेस वैतेश्वरले आयोजना गरेको उक्त चुनावी सभामा दुईहजार बढी बैतेश्वरका जनता मैनापोखरीमा उपस्थित भएका थिए । 

कांग्रेस वैतेश्वरका पार्टी सभापति मनिक तामाङको सभापतित्वमा उद्घाटन गरिएको कार्यक्रममा करिब २ हजार बढी नेपाली कांग्रेसका नेता कार्यकर्ता सभामा सहभागी बनेका थिए ।

कार्यक्रममा नेपाली कांग्रेसका प्रतिनिधिसभा सदस्यका उम्मेदवार अजयवावु शिवाकोटी, समानुपातिक उम्मेदवार छिरिङलोल्मा शेर्पा,कांग्रेस केन्द्रीय सदस्य कुन्दनराज काफ्ले, जिल्ला पार्टी सभापति बर्मा लामालगायतले सभालाई सम्बोधन गर्दै नव पार्टी प्रवेशीहरुलाई स्वागत गरेका थिए ।

त्यसैगरी सभालाई सम्बोधन गर्दै उम्मेदवार अजयबाबु शिवाकोटीले दोलखाको समृद्धि र विकासमा नेपाली कांग्रेसको विकल्प नदेखिएकाले फागुन २१ गते हुने निर्वाचनमा नेपाली कांग्रेसलाई मतदान गरेर आफूलाई विजयी गराउन वैतेश्वर बासीलाई अनुरोध गरे ।

त्यसैगरी कांग्रेस नेता कुन्दनराज काफ्लेले वैतेश्वरमा कांग्रेसले गरेको विकासको स्मरण गराउँदै आउँदो चुनावमा पनि कांग्रेसलाई एकजुट भएर मतदान गर्न अपिल गरे । सुवाश बस्नेत/दोलखा