काठमाडौं– नेपाली कम्युनिष्ट पार्टी(नेकपा)ले आसन्न प्रतिनिधिसभा निर्वाचनलाई सफल बनाउन आह्वान गरेको छ । 

बिहीबार पार्टी कार्यालय पेरिसडाँडामा पत्रकार सम्मेलन गर्दै नेकपाले लोकतन्त्रको सुदृढीकरण र विकासको यात्रामा अगाडि बढ्न आगामी निर्वाचन निकै महत्त्वपूर्ण भएको भन्दै निर्वाचनलाई सफल बनाउन आह्वान गरेको हो । नेकपाले राष्ट्रिय स्वाधीनता र स्वाभिमानको रक्षाका निम्ति त्यही दृढताका साथ उभिने प्रतिबद्धता समेत जनाएको छ ।

मुलुकको व्यवस्थाविरुद्ध अहिले पनि अनेक प्रकारका षड्यन्त्र भइरहेकाले अहिलेकै प्रणालीमार्फत सबै षड्यन्त्रहरूलाई परास्त गर्दै यसलाई सुदृढ र स्थिर बनाउँदै समाजवादी लोकतन्त्रको रूपमा विकास गर्न चाहेको नेकपा संयोजक पुष्पकमल दाहाल प्रचण्डले बताए  । उनले असहज परिस्थितिमा हुन लागेको निर्वाचनलाई सफल पार्नु सबैको दायित्व भएको धारणा राखे । 

प्रचण्डले जेन-जी आन्दोलनका क्रममा युवाहरूलाई निर्ममतापूर्वक ज्यान लिने र दुई तिहाइको अहंकारले भ्रष्टाचारीलाई संरक्षण गर्ने प्रवृत्तिले निर्वाचनका बेला समेत आत्मसमीक्षा गर्न तयार नभएको उल्लेख गरे । 

त्यस्तै जेन-जी आन्दोलनको नैतिक जिम्मेवारी समेत लिन तयार नहुने अर्को प्रवृतिविरुद्ध समेत नेकपा सुरुदेखि नै संघर्षमा रहेको उनले बताए । उनले दुवै गलत प्रवृत्ति अहिले निर्वाचनको प्रक्रियामा समेत रहेकाले नेकपा राष्ट्रको स्वाधीनतालाई रक्षा गर्ने उद्देश्यका साथ निर्वाचनमा होमिएको जिकिर गरे । उनले आसन्न निर्वाचनमा कुनै पनि दलसँग समीकरण नगर्ने स्पष्ट पारे । 

नेकपाले संविधान कार्यान्वयनको गम्भीर समीक्षा एवं पुनरावलोकन गरेर शासकीय स्वरूपलगायत विभिन्न पक्षमा परिमार्जन गर्ने, निर्वाचन प्रणालीलाई परिवर्तन गरेर सरल र कम खर्चिलो बनाउने, एक उच्चस्तरीय सम्पत्ति छानबिन आयोग गठन गरेर आजसम्म सार्वजनिक पद धारण गरेका सबै व्यक्तिको सम्पत्ति छानबिन गर्ने सवालमा प्रतिबद्ध रहेको जनाएको छ ।