काठमाडौँ – राजधानीका तीन जिल्ला (काठमाडौँ, ललितपुर र भक्तपुर) का नेपाली कांग्रेसका उम्मेदवारहरूले विकासको साझा मार्गचित्र ‘भिजन १०’ सार्वजनिक गर्ने भएका छन्। उपत्यकाको एकीकृत र दिगो विकासका लागि तयार पारिएको १० बुँदे साझा प्रतिबद्धता बिहीबार दिउँसो १ बजे सार्वजनिक गर्न लागिएको हो।

पार्टी महामन्त्री एवं काठमाडौँ क्षेत्र नं. ५ का प्रतिनिधिसभा सदस्य उम्मेदवार प्रदीप पौडेलको विशेष सक्रियतामा यो मार्गचित्र तयार पारिएको हो। महामन्त्री पौडेलले उपत्यकाको यातायात व्यवस्थापन, भौतिक पूर्वाधार निर्माण र प्रदूषण नियन्त्रणजस्ता साझा मुद्दाहरूमा उम्मेदवारबीच परामर्श गरी यो खाका तयार पारेका हुन्।

“समग्र उपत्यकाको विकास हाम्रो प्राथमिकतामा छ। एक्लाएक्लैभन्दा साझा रूपमा मुद्दा उठाउँदा कार्यान्वयनमा सहज हुने भएकाले संयुक्त प्रतिबद्धता सार्वजनिक गर्न लागेका हौँ,” महामन्त्री पौडेलले भने। उनले आगामी पाँच वर्षभित्र उपत्यकामा गरिने मुख्य कामहरूको स्पष्ट खाका यसमा समेटिएको जानकारी दिए।

नेपाली कांग्रेस काठमाडौँका सचिव सुशन वैद्यका अनुसार काठमाडौँको विशालनगरस्थित भाटभटेनीमा आयोजना गरिने विशेष कार्यक्रममा तीनै जिल्लाका प्रतिनिधिसभा र प्रदेशसभा सदस्यका उम्मेदवारहरू सहभागी हुनेछन्।

राजधानीको बढ्दो सहरीकरणलाई व्यवस्थित गर्न र उपत्यकावासीका साझा समस्या समाधानका लागि यो ‘भिजन १०’ ले मार्गप्रशस्त गर्ने कांग्रेसको विश्वास छ।