काठमाडौं – चर्चित कलाकार तथा राष्ट्रिय स्वतन्त्र पार्टी (रास्वपा) का समानुपातिक उम्मेदवार प्रकाश सपुतले नयाँ राजनीतिक शक्तिको निर्माण र त्यसमा खुलेर सरिक हुने घोषणा गरेका छन् । सामाजिक सञ्जालमार्फत लामो स्टाटस सार्वजनिक गर्दै उनले संघीय लोकतान्त्रिक गणतन्त्र र नयाँ संविधान स्थापनाका लागि योगदान दिने सम्पूर्ण शहीद, राजनीतिक दल तथा अग्रज नेताहरूप्रति कृतज्ञता व्यक्त गरेका छन् ।

सपुतले सम्पूर्ण नेपालीको व्यक्तिगत राजनीतिक आस्था र विचारको सम्मान गर्दै कसैप्रति अपमान वा अनादर नगर्ने प्रतिबद्धता जनाएका छन् । नयाँ समय र नयाँ आन्दोलनको आवश्यकतालाई औंल्याउँदै उनले देशको सुधार, विकास र समृद्धिका लागि नयाँ राजनीतिक विकल्प स्थापना अपरिहार्य भएको बताएका छन् ।

रास्वपाका सभापति रवि लामिछाने र काठमाडौं महानगरपालिकाका प्रमुख बालेन शाहलाई सम्बोधन गर्दै सपुतले आफ्नो निर्णय जीवनकै सबैभन्दा कठोर निर्णय भएको उल्लेख गरेका छन् । विभिन्न राजनीतिक आस्थामा विश्वास राख्ने दर्शक–स्रोताको मन दुख्ने जोखिम हुँदाहुँदै पनि देशका लागि यो बाटो रोजेको उनको भनाइ छ ।

‘पेशा र व्यावसायिक हिसाबले यो मेरो जीवनकै कठोर निर्णय हो,’ उनले लेखेका छन्, ‘तर यो निर्णय गलत सावित हुनेछैन भन्नेमा म विश्वस्त छु।’ कुनै दलमा लागेको भन्दै अहिले असन्तुष्ट भएका दर्शक–स्रोताको विश्वास भविष्यमा काम र इमानदारीबाट जित्ने दाबी पनि उनले गरेका छन् ।