सर्लाही– नेपाली कांग्रेसका सभापति गगन थापाले मधेशप्रति आफ्नो प्रतिबद्धता व्यक्त गरेका छन् । आसन्न प्रतिनिधिसभा चुनावमा सर्लाही-४ बाट उम्मेदवारी दिएपछि सोमबार निर्वाचन क्षेत्र पुगेर सम्बोधन गर्दै उनले मधेसले नेपालको लोकतान्त्रिक आन्दोलनमा दिएको योगदान र बलिदानलाई सम्मान नपुगेको भन्दै त्यसको कारण र समाधान खोज्न आफू मधेश आएको बताए।

सभापति थापाले आफूले सबैभन्दा धेरै संगत गरेको नेता प्रदीप गिरी रहेको स्मरण गर्दै भने, ‘प्रदीप गिरीले मलाई मधेश बुझ्न सिकाउनुभयो। तर जबसम्म म स्वयं मधेसमा गएर समर्पित हुँदिनँ, मधेशलाई आफूभित्र ल्याउँदिनँ, तबसम्म म पूर्ण नेपाली बन्न सक्दिनँ भन्ने बोध उहाँबाटै पाएँ।’ यही विश्वासका साथ आज आफू मधेस झरेको उनको भनाइ थियो।

मधेसमा अपार सम्भावना हुँदाहुँदै पनि यहाँका धेरै युवाहरू रोजगारीका लागि विदेशिनु परेको यथार्थप्रति चिन्ता व्यक्त गर्दै थापाले यसको उत्तर खोज्न र समाधान गर्न आफू आएको बताए ।

 ‘कुनै समय देशभर गणित र विज्ञान पढाउने शिक्षक मधेशबाटै जानुपर्थ्यो। त्यही मधेस आज किन कमजोर बन्यो भन्ने प्रश्नको उत्तर खोज्न म यहाँ छु,’ उनले भने।

उनले आफू चुनावी प्रतिबद्धता गर्न नभई नेपाली कांग्रेसको जिम्मेवार पदमा रहेर सर्लाहीका मुद्दालाई विशेष प्राथमिकताका साथ अघि बढाउन आएको स्पष्ट पारे । ‘मसँग कार्यक्रम र योजनाहरू छन्। समयसँगै तपाईंहरूसँग साझा गर्छु,’ सभापति थापाले भने ।