काठमाडौं– पाटन स्वास्थ्य विज्ञान प्रतिष्ठान अन्तर्गतको स्कुल अफ मेडिसिनको डिनमा प्रा.डा. नवीस मान सिंह प्रधान नियुक्त भएका छन् ।

नवनियुक्त डिन प्रा.डा. प्रधान २३ वर्षदेखि पाटन स्वास्थ्य विज्ञान प्रतिष्ठानमा चिकित्सा सेवा र प्राध्यापनमा सक्रिय रहँदै आएका छन् । उनी प्रतिष्ठानका वरिष्ठ अर्थोपेडिक्स सर्जन तथा प्राध्यापक हुन् ।

डा. प्रधानले विगत दुई दशकभन्दा बढी समयदेखि नेपालको चिकित्सा शिक्षा, क्लिनिकल सेवा र अनुसन्धान क्षेत्रमा महत्त्वपूर्ण योगदान पुर्‍याउँदै आएका छन् । उनले चीनको पेकिङ युनिभर्सिटीबाट अर्थोपेडिक्समा एमएस गरेका छन् ।

जोर्नी प्रत्यारोपण तथा काँधसम्बन्धी शल्यक्रियामा विशेष दक्षता राख्ने डा. प्रधानलाई अनुभवी चिकित्सक र शिक्षकका रूपमा चिनिन्छ । स्कुल अफ मेडिसिनको नेतृत्वमा उनको नियुक्तिले शिक्षा, सेवा र अनुसन्धानलाई थप सुदृढ बनाउने अपेक्षा गरिएको छ ।