काठमाडौं – दिनेश राउत निर्देशित लभ स्टोरी फिल्म ‘कुमारी’ विदेशमा पनि प्रदर्शनमा आउने तय भएको छ ।

निर्माण पक्षले विदेश प्रदर्शन अधिकार बिक्री गरी विभिन्न देशमा प्रदर्शनको टुंगो लगाएको सोमबार जानकारी दिएको छ ।

निर्माता महेन्द्र अधिकारीका अनुसार अस्ट्रेलिया, अमेरिका, क्यानडा र मध्यपूर्वका देशका लागि प्रदर्शन अधिकार बिक्री भएको हो ।

ट्रेलर सार्वजनिक भएको केही दिनमा नै यो फिल्मको विदेश प्रदर्शन अधिकार बिक्री भएको हो ।

शनिबार सार्वजनिक ट्रेलरले युट्युबमा ८ लाखभन्दा बढी भ्युज पाएको छ ।

‘कुमारी’को नायक अविषेक खड्का र नायिका आकृति राजभण्डारी हुन् । यी दुवैको यो डेब्यू फिल्म हो ।

माघ २३ गते प्रदर्शन मिति तोकिएको यस फिल्मका लेखक विकास सुबेदी हुन् ।