वासिङ्टन – अमेरिकी राष्ट्रपति डोनाल्ड ट्रम्पले इरानले अघि सारेको युद्धविराम प्रस्ताव अस्वीकार गरेको दाबी गरिएको छ ।

अमेरिकी अखबार द वाल स्ट्रिट जर्नलको रिपोर्टअनुसार ट्रम्पले अमेरिकामा आगामी नोभेम्बरमा हुने मध्यावधि निर्वाचनपछि इरानमाथि पुनः हवाई आक्रमण गर्न सकिने विषयमा आफ्ना सल्लाहकारहरूसँग छलफल गरेका छन् ।

इरानले अमेरिका र इरानबीचको तनाव कम गर्ने तथा रणनीतिक महत्वको हर्मुज जलडमरूमध्य पुनः खुला गर्ने उद्देश्यसहित सातदिने युद्धविराम प्रस्ताव अघि सारेको बताइएको छ । रिपोर्टमा उक्त प्रस्ताव ट्रम्पले अस्वीकार गरेको उल्लेख छ ।

इरानी विदेशमन्त्री अब्बास अराघचीले शुक्रबार संयुक्त राष्ट्रसंघ मुख्यालयमा पत्रकारहरूसँग कुरा गर्दै हर्मुज जलडमरूमध्य खोल्ने प्रक्रिया अमेरिकाले सम्झौतामा उल्लेखित आवश्यक सर्त पूरा गरेपछि मात्र सुरु हुने बताएका थिए ।

इरान र अमेरिकाबीच हर्मुज जलडमरूमध्यको सञ्चालन, आणविक कार्यक्रम र प्रतिबन्धलगायत विषयमा मतभेद रहँदै आएको छ । यसअघि पनि दुई देशबीच युद्धविराम र तनाव कम गर्ने प्रयास भए पनि जलडमरूमध्य खोल्ने विषयमा सहमति जुट्न कठिन भएको थियो।

यसै साता ट्रम्पले इरानलाई कडा सैन्य कारबाहीको चेतावनी दिएका थिए । यद्यपि, त्यसपछि उनले इरानी पक्षसँग अमेरिकी प्रतिनिधिहरूको ‘राम्रो कुराकानी’ भएको बताएका थिए ।