वीरगञ्ज– विपद्को समयमा सुरक्षित रहने उपायबारे सर्वसाधारणलाई जानकारी गराउने उद्देश्यले वीरगञ्जमा जनचेतनामूलक कार्यक्रम आयोजना गरिएको छ । 

सामुदायिक सेवा केन्द्र तथा सामुदायिक प्रहरी सेवा केन्द्र मीनाबजारले विपद्को समयमा हुन सक्ने जोखिम र त्यसबाट बच्ने उपायबारे सर्वसाधारणलाई जानकारी गराउने उद्देश्यले वीरगञ्जमा जनचेतनामूलक कार्यक्रम आयोजना गरिएको हो ।

वीरगञ्जको घण्टाघर क्षेत्रमा आयोजित कार्यक्रममा बाढी, पहिरो, ढुवान तथा अन्य प्राकृतिक विपद्का बेला अपनाउनुपर्ने सावधानी तथा सुरक्षित रहने उपायसम्बन्धी सूचनामूलक सामग्री वितरण गरिएको छ ।

सामुदायिक प्रहरी सेवा केन्द्र मीनाबजारकी इन्चार्ज प्रहरी हवल्दार सन्ध्या गुरौले कार्यक्रममार्फत स्थानीय बासिन्दा, रिक्सा तथा ठेला चालक र यात्रुहरूलाई विपद्का कारण उत्पन्न हुन सक्ने आर्थिक, मानसिक तथा सामाजिक जोखिमबारे जानकारी गराइएको बताइन्।

कार्यक्रममा विपद्का बेला अस्थायी शिविरमा बस्दा अपनाउनुपर्ने सावधानी तथा महिला र बालबालिकाको सुरक्षाका विषयमासमेत सचेत गराइएको थियो। 

साथै विपद्का समयमा हुन सक्ने असुरक्षित वैदेशिक रोजगारी, मानव बेचबिखन, आगलागी, बाढी, भूकम्पलगायत अवस्थामा अपनाउनुपर्ने सुरक्षा उपायका साथै अपरिचित व्यक्तिको शंकास्पद गतिविधिप्रति सतर्क रहनेबारे पनि सचेतना फैलाइएको गुरौले जानकारी दिइन् ।