मस्को– रुसी राष्ट्रपति भ्लादिमिर पुटिनले युक्रेनका उत्तेजक तथा तनाव बढाउने गतिविधिले उसले खोजेको परिणाम हासिल नहुने र त्यसले अवस्था थप जटिल बनाउने चेतावनी दिएका छन् ।

शुक्रबार पत्रकार सम्मेलनमा पुटिनले युक्रेनले उत्तेजक गतिविधि वा तनाव बढाउने कुनै पनि कदम चालेर आफूले चाहेको परिणाम प्राप्त गर्न नसक्ने बताए। त्यस्ता गतिविधिले युक्रेनकै अवस्था थप कठिन बनाउने उनको भनाइ थियो।

रुसले गरेको सैन्य जबाफी कारबाहीपछि युक्रेनले ऊर्जा संरचनामाथिको आक्रमण तथा हवाई हमलालगायत विभिन्न क्षेत्रमा युद्धविरामसम्बन्धी व्यवस्था गर्न खोजेको पुटिनले दाबी गरे ।

युक्रेनले कथित रूपमा समुद्री नाकाबन्दी लागू गर्ने प्रयास गर्नुका साथै भण्डारण केन्द्र र नागरिक पूर्वाधारमा आक्रमण गरेको आरोप लगाउँदै रुसले त्यसको जवाफ दिन थालेको उनले बताए।

पुटिनका अनुसार युक्रेनका गतिविधिका कारण कृष्ण सागरमा रहेका १०० भन्दा बढी पानीजहाजमा क्षति पुगेको रुसी पक्षको आकलन छ।