काठमाडौं– पाकिस्तानको पञ्जाब प्रान्तको लाहौरमा प्रहरी हिरासतमा रहेका एक महिला र किशोरीको रहस्यमय मृत्यु भएपछि यसले गम्भीर चासो र विवाद सिर्जना गरेको छ। अन्तर्राष्ट्रिय अधिकारवादी संस्थाले यस घटनाको निष्पक्ष, स्वतन्त्र र पारदर्शी फौजदारी छानबिन गर्न जोडदार माग गरेको छ।

गत महिनाको सुरुमा स्थानीय बासिन्दाले चोरीको आरोप लगाएर प्रहरीको जिम्मा लगाएका दुई महिलालाई लाहौरका भिन्न-भिन्न प्रहरी चौकीमा राखिएको थियो। प्रहरी हिरासतमा रहेको केही घण्टाभित्रै उनीहरूको स्वास्थ्य अवस्था अचानक बिग्रिएको र अस्पताल तथा चौकीमै उनीहरूको मृत्यु भएको प्रहरी दाबी छ। प्रारम्भिक पोष्टमार्टम रिपोर्टमा उनीहरूको मृत्यु मुटुको चाल बन्द भएर भएको देखिए पनि वास्तविक कारण खुल्न सकेको छैन। 

तर, पीडित परिवारले भने प्रहरीको उक्त दाबीलाई ठाडै अस्वीकार गरेका छन्। परिवारजनले शवमा यातनाका डोबहरू रहेको, कपडा च्यातिएको र प्रहरीले घटना लुकाउन तथा चुप लगाउन आफूहरूलाई पैसाको प्रलोभन समेत देखाएको गम्भीर आरोप लगाएका छन्। 

यता प्रहरी अधिकारीहरूले भने उनीहरू अत्यधिक लागूऔषध सेवनका कारण मृत फेला परेको हुनसक्ने प्राथमिक अनुमान प्रस्तुत गरेका छन्। घटनालगत्तै अधिकारवादी संघसंस्था तथा नागरिक समाजले हिरासतभित्र हुने यस्ता मानवीय हननका घटनाहरूप्रति कडा आपत्ति जनाएका छन्। 

सम्बन्धित निकायहरूले पाकिस्तान सरकारलाई यसबारे तत्काल स्वतन्त्र छानबिन समिति गठन गर्न र दोषीमाथि कडा कानुनी कारबाही गर्न आह्वान गरेका छन्।