काठमाडौं – गृहमन्त्री सुधन गुरुङ जोडिएको ‘हामी नेपाल’ नामक गैरसरकारी संस्थाले सरकारको निर्देशनविपरीत सहयोग आह्वान गरेको छ। उक्त संस्थाले आफ्नै खाता नम्बर दिएर रसुवा बाढीपीडीतको नाममा आर्थिक माग गरेको हो ।

उक्त संस्थाले रसुवामा हालको बाढीको स्थितिको अध्ययन गरेपछि प्रभावितहरूका लागि सहयोग उपलब्ध गराउन लागेको जनाएको छ।

‘बाढीले घर, जीविकोपार्जनका स्रोत र आधारभूत आवश्यकताका सामग्रीहरू बगाएर लगेको छ, जसका कारण धेरै मानिसहरू आश्रय, खाना र स्वच्छ पानीको पहुँचबाट वञ्चित भएका छन्,’ सामाजिक सञ्जाल इन्स्टाग्राममा भनेको छ, ‘हामी नेपालको उद्धार तथा राहत टोली हाल रसुवामा प्रभावितहरूलाई तत्काल सहयोग पुर्‍याउन खटिरहेको छ। तर क्षतिको व्यापकतालाई हेर्दा यो कार्यलाई निरन्तरता दिन हामी सबैको सामूहिक सहयोगको तत्काल आवश्यकता छ।’

यस संस्थाले जिन्सी सहयोग गर्न चाहनेले र आर्थिक सहयोग चाहनेले पनि सहयोग गर्न सक्ने जनाएको छ। आर्थिक सहयोग माग्दै हामी नेपालको नबिल बैंक महाराजगञ्ज शाखाको क्यूआर सार्वजनिक गरिएको छ।

तर सरकारले भने आफूखुसी राहत तथा आर्थिक सहायता उठाउने काम नगर्न निर्देशन जारी गरेको छ। सरकारको निर्देशनविपरीत गृहमन्त्रीकै संस्था भने आर्थिक सहयोग मागिरहेको छ।