काठमाडौं–  रसुवा, नुवाकोट, धादिङलगायतका जिल्लामा आएको विनाशकारी बाढीबाट ठूलो जनधनको क्षति भएपछि यस वर्ष आयोजना हुने भनिएको ‘२०८३ को गाईजात्रा’ कार्यक्रम स्थगित गरिएको छ ।

ब्राण्डवर्थ प्रालिले कमलादीस्थित नेपाल प्रज्ञा–प्रतिष्ठानमा भदौ १२, १३ र १४ गते आयोजना गर्ने तयारी गरेको ‘८३ सालको गाईजात्रा’ कार्यक्रम विषम परिस्थितिका कारण तत्कालका लागि स्थगित गरिएको जनाएको हो ।

बरिष्ठ हास्य व्यङ्ग्य मनोज गजुरेलले सामाजिक सञ्जालमार्फत सूचना जारी गर्दै बाढीमा परी ज्यान गुमाउनेहरूप्रति श्रद्धाञ्जली अर्पण गरेका छन् । उनले शोकाकुल परिवारजनमा समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेका छन् ।

गजुरेलले विपद्को समयमा उद्धार तथा सहयोग कार्यमा जुट्न सबैलाई अपिलसमेत गरेका छन् ।

बाढीबाट रसुवा, नुवाकोट, धादिङलगायतका जिल्लामा ठूलो जनधनको क्षति भएपछि विभिन्न सार्वजनिक तथा सांस्कृतिक कार्यक्रम स्थगित हुन थालेका छन् ।