काठमाडौं- रसुवाको भोटेकोशी नदीमा आएको बाढी नारायणी नदी हुँदै देवघाट पुगेको छ।

बाढी पूर्वानुमान महाशाखाले बुधबार दिउँसो ३ः२० बजे ‘हाई अलर्ट’ जारी गर्दै नदी आसपासका बस्ती तथा बजार क्षेत्रमा उच्च सतर्कता अपनाउन आग्रह गरेको छ।

महाशाखाका अनुसार भोटेकोशीमा आएको बाढी हाल नारायणी नदीको देवघाट क्षेत्रमा पुगेको र जलसतह बढ्दो क्रममा रहेको छ।

महाशाखाले नदी छेउछाउका बस्ती तथा बजार क्षेत्रमा रहेका नागरिकलाई सुरक्षित स्थानमा रहन अनुरोध गरेको छ।

‘रसुवा भोटेकोशीमा आएको बाढी हाल नारायणी देवघाट पुगेको र बढ्दो क्रममा रहेकोले नदी छेउछाउका बस्ती, बजार क्षेत्रमा उच्च सतर्कतासहित सुरक्षित स्थानमा रहन अनुरोध छ,’ महाशाखाले जारी गरेको सूचनामा भनिएको छ।

यसअघि भोटेकोशीमा आएको बाढीले रसुवाका टिमुरे, स्याफ्रुबेँसी, मैलुङलगायतका क्षेत्रमा ठूलो क्षति पुर्‍याएको थियो। बाढी त्रिशूली हुँदै मलेखु, मुग्लिन पार गरेर नारायणी नदीतर्फ पुगेको हो।

महाशाखाले नारायणी नदी आसपासका बस्ती तथा बजार क्षेत्रमा रहेका नागरिकलाई सम्भावित जोखिमलाई ध्यान दिँदै सतर्क रहन तथा सुरक्षित स्थानमा जान आग्रह गरेको छ।