काठमाडौं– रसुवाको भोटेकोशी नदीमा आएको बाढीको बहाव धादिङको गल्छी–मलेखु क्षेत्र पार गरिसकेको छ । 

बाढीको बहाव अब केही घण्टाभित्र मुग्लिन हुँदै तलतर्फ जाने अनुमान गरिएपछि त्रिशूली नदी आसपासका बस्ती र बजार क्षेत्रमा जोखिम बढेको छ ।

प्रहरीले एक सूचना जारी गर्दै पृथ्वी राजमार्ग, मुग्लिन–नारायणघाट सडकखण्ड तथा त्रिशूली नदी किनारका क्षेत्रमा विशेष सतर्कता अपनाउन आग्रह गरेको छ । 

नदी किनारमा रहेका बस्ती तथा बजार क्षेत्रका स्थानीयलाई सम्भावित जोखिमलाई ध्यानमा राख्दै सुरक्षित स्थानमा जान र आवश्यक परे तत्काल क्षेत्र खाली गर्न अनुरोध गरिएको छ।

विशेषगरी नदीको बहाव थप बढ्न सक्ने भएकाले त्रिशूली नदी किनार तथा आसपासका क्षेत्रमा नजान प्रहरीले सचेत गराएको छ ।

सडकमार्गमा यात्रा गर्नेहरूलाई समेत सावधानी अपनाउन आग्रह गरिएको छ।

प्रहरीले स्थानीय प्रशासन तथा सम्बन्धित निकायबाट जारी हुने सूचना नियमित रूपमा हेर्न र निर्देशन पालना गर्न आग्रह गरेको छ। सम्भावित जोखिमबाट जोगिन स्थानीयलाई अहिले नै सतर्क रहन र सुरक्षित स्थानमा बस्न अनुरोध गरिएको छ।