काठमाडौं– नेपालको पुरुष भलिबल फ्रेन्चाइज लिग, नेपाल भलिबल लिग (एनभीएल) को अक्सन कार्यक्रम सम्पन्न भएको छ ।

आइतबार काठमाडौमा आयोजना गरिएको अक्सनका क्रममा राष्ट्रिय तथा प्रादेशिक स्तरका ’ए’, ’बी’ र ’सी’ क्याटेगरीका खेलाडीहरूमाथि ६ वटै टिमले उत्साहजनक रूपमा बोली लगाएका थिए । 

कार्यक्रममा बोल्दै नेपाल भलिबल सङ्घका अध्यक्ष जितबहादुर चन्दले नेपालमा भलिबलको क्रेज र लोकप्रियता तीव्र रूपमा बढिरहेको बताए । 

उनले पछिल्लो समय महिला तथा पुरुष भलिबल टोलीले अन्तर्राष्ट्रिय स्तरमा हासिल गरेको सफलताले नेपाल दक्षिण एसियामै भारतपछिको बलियो टोलीका रूपमा स्थापित भएको दाबी गरे । 

अध्यक्ष चन्दले भलिबललाई थप व्यावसायिक बनाउन र खेलाडीहरूको भविष्य सुरक्षित गर्न यस्ता फ्रेन्चाइज लिगहरूले महत्त्वपूर्ण योगदान पुर्‍याउने विश्वास व्यक्त गरे ।

यस पटकको नेपाल भलिबल लिगमा सगरमाथा स्म्यासर्स, मधेश वारियर्स, काठमाडौं रेड्स, अन्नपूर्ण स्पाइकर किङ्स, कर्णाली शिवाराज र खप्तड फाल्कन्स गरी ६ फ्रेन्चाइज टोलीको सहभागिता रहनेछ । 

नेपाली भलिबलको इतिहासमा पहिलो पटक फ्रेन्चाइज मोडलमा आयोजना हुन लागेको यस लिगले खेलाडीलाई नयाँ अवसर र नेपाली भलिबलको व्यावसायिक विकासमा महत्त्वपूर्ण योगदान पुर्‍याउने अपेक्षा गरिएको छ। 

एनभीलको पहिलो संस्करण भदौ १२ गतेदेखि काठमाडौंको त्रिपुरेश्वरस्थित कभर्डहलमा हुने तय छ ।