काठमाडौं – ‘म्याथ सिक्ने भए…’ भन्ने गीतले विवादमा परेको फिल्म ‘मास्टर्नी’को टिजर सार्वजनिक भएको छ ।

नायिका प्रियंका कार्कीको निर्माण र शीर्ष अभिनय रहेको यस फिल्मको टिजर स्टार कलाकारहरूको अभिनय रहेको जानकारी दिन केन्द्रित रहेको छ । टिजरमा नायकहरू आर्यन सिग्देल, प्रमोद अग्रहरी र नायिका ऋचा शर्मालाई प्रस्तुत गरिएको छ ।

नायिका सिम्रन खड्का भने प्रियंकाको छोरीको भूमिकामा देखिएकी छन् ।

‘यो फिल्ममा स्टार कलाकार धेरै छन्’ भन्ने चर्चालाई टिजरले केही हदसम्म न्याय गरेको छ । टिजर पनि यही चर्चा र उत्सुकता मेट्न केन्द्रित रहेको देखिन्छ । किनभने टिजरमा फिल्मको कथावस्तुबारे खासै जानकारी दिइएको छैन ।

तथापि, फिल्मले क्राइम सस्पेन्स कथा प्रस्तुत गर्ने टिजरले खुलाउँछ ।

यो फिल्म प्रियंकाको होम प्रोडक्सनमा बनेको हो । यही फिल्मबाट उनी आधिकारिक रुपमा निर्माणमा होमिएकी हुन् ।

यस फिल्मको कथा प्रियंकाको हो । स्क्रिप्ट शान बस्नेतले लेखेका हुन् । संवाद भने शान र प्रियंका दुवै मिलेर लेखेका हुन् ।

सुवेन्दु घोषको निर्देशनमा फिल्म बनेको हो । भदौ ५ बाट फिल्म प्रदर्शनमा आउने बताइएको छ ।