वीरगञ्ज– नेपाल चिकित्सक संघ, नारायणी शाखाले नारायणी अस्पतालमा कार्यरत चिकित्सक डा. प्रमोद रामसहित अन्य चिकित्सकमाथि भएको सामूहिक भौतिक आक्रमण, अस्पतालमा गरिएको तोडफोड तथा अवाञ्छित गतिविधिप्रति गम्भीर ध्यानाकर्षण भएको जनाएको छ ।

शनिबार शाखा अध्यक्ष डा. मनोज कुमार गुप्ताको अध्यक्षतामा बसेको आकस्मिक बैठकपछि जारी प्रेस विज्ञप्तिमा संघले यस्ता हिंसात्मक घटनाले सम्पूर्ण चिकित्सक समुदायलाई स्तब्ध र आक्रोशित बनाएको उल्लेख गरेको छ ।

संघले घटनामा संलग्न व्यक्तिहरूमाथि मुलुकी अपराध संहिता, २०७४ तथा स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ (संशोधनसहित) बमोजिम तत्काल मुद्दा दर्ता गरी कानुनअनुसार कडा कारबाही गर्न माग गरेको छ ।

त्यस्तै, घटनापछि निलम्बनमा परेका पीडित चिकित्सकहरूको निलम्बन तत्काल फिर्ता गरी उनीहरूको पेशागत सम्मान, सुरक्षा र मनोबल पुनःस्थापित गर्न पनि संघले माग गरेको छ । साथै, वैज्ञानिक आधारबिनै गठन गरिएको छानबिन समिति तत्काल खारेज गर्नुपर्ने जनाएको छ ।

विज्ञप्तिमा चिकित्सक तथा स्वास्थ्य संस्थाको कार्यसम्पादनमा पत्रकार वा अन्य कुनै पक्षबाट हुने अनधिकृत हस्तक्षेप, अनावश्यक दबाब तथा सार्वजनिक रूपमा गरिने पूर्वाग्रही र चरित्रहत्या गर्ने टिप्पणी रोक्न समेत सम्बन्धित निकायसँग आग्रह गरिएको छ ।

संघले स्वास्थ्यकर्मीको सुरक्षा सुनिश्चित गर्दै स्वास्थ्य संस्थामा शान्तिपूर्ण र सुरक्षित कार्य वातावरण कायम गर्न सरकार तथा सम्बन्धित निकायलाई आवश्यक कदम चाल्न अनुरोध गरेको छ।