तेहरान – क्यास्पियन सागरमा आफ्नो व्यावसायिक जहाजमाथि युक्रेनले ड्रोन तथा क्षेप्यास्त्र आक्रमण गरेपछि इरानले तेहरानस्थित युक्रेनी कूटनीतिज्ञलाई मन्त्रालयमा झिकाएर कडा आपत्ति जनाएको छ। युक्रेनी हमलामा एक इरानी नाविकको मृत्यु हुनुका साथै अन्य घाइते भएका छन्।

युक्रेनले भने रुसका लागि सैन्य सामग्री ओसारपसार गरिरहेका जहाजलाई लक्षित गरी आक्रमण गरिएको दाबी गरेको छ। युक्रेनी राष्ट्रपति भोलोदिमिर जेलेन्स्कीले रुसले मध्यपूर्वमा इरानको सैन्य अभियानलाई सघाइरहेको आरोप लगाएका छन्।

इरानी विदेश मन्त्रालयले उक्त आक्रमण संयुक्त राष्ट्रसंघको बडापत्रको उल्लङ्घन भएको जनाउँदै अन्तर्राष्ट्रिय समुदाय र राष्ट्रसंघीय सुरक्षा परिषद्लाई युक्रेनी कदमको भर्त्सना गर्न आग्रह गरेको छ। इरानी विदेशमन्त्री अब्बास अराघचीले युरोपेली युनियनका विदेश नीति प्रमुखसँग टेलिफोन वार्ता गर्दै युक्रेनको ‘शत्रुतापूर्ण’ व्यवहारप्रति गम्भीर चिन्ता व्यक्त गरेका छन्। अमेरिकाले लगाएको जलपरिवाहन नाकाबन्दीका कारण मारमा परेको इरानका लागि क्यास्पियन सागरको यो घटना थप तनावको विषय बनेको छ।

पश्चिम बैंकमा बस्ती विस्तार तीव्र पारिने

अर्कोतर्फ, इजरायलका अर्थमन्त्री बेजालेल स्मोट्रिचले कब्जा गरिएको पश्चिम बैंकको नाबलुस नजिकै रहेको ‘एली’ बस्तीमा थप ७६३ वटा नयाँ घर निर्माण गर्ने घोषणा गरेका छन्। हालै भएको प्राणघातक मुठभेडलगत्तै आएको यो घोषणाले सो क्षेत्रमा थप तनाव बढाएको छ।

अन्तर्राष्ट्रिय कानुनविपरीत निर्माण भइरहेका यी नयाँ संरचनाले एली बस्तीको आकार तेब्बर बनाउनेछ। गत शुक्रबार नाबलुस नजिकै इजरायली बसोबासी (सेटलर) र स्थानीयबीच भएको झडपमा चार प्यालेस्टिनी र दुई इजरायलीको मृत्यु भएको थियो। सन् २०२२ यता इजरायल सरकारले पश्चिम बैंकमा १०४ वटा नयाँ बस्ती र १६० वटा कृषि आउटपोस्ट स्वीकृत गरिसकेको छ।