काठमाडौं– राष्ट्रिय स्वतन्त्र पार्टी (रास्वपा) को केन्द्रीय सदस्यका उम्मेदवार ज्वाला संग्रौलाले मतपत्रमा आफ्नो परिचित नाम हटाइएको भन्दै आपत्ति जनाएकी छन् ।  

बिहीबार रास्वपा महाधिवेशन स्थल चितवनमा सञ्चारकर्मीसंग कुरा गर्दै संग्रौलाले सुरुदेखि नै आफ्नो परिचित नाम ज्वाला भए पनि मतपत्रमा टिका संग्रौलामा राखिएकाले मत दिनेहरू झुक्किएको भन्दै आपत्ति जनाएकी हुन् । 

मतपत्रमा ज्वाला नाम नदेख्दा प्रतिनिधिहरूले आफूहरूलाई भोट नहाली आएको उनको दाबी छ । उनले नियतवश वा प्राविधिक त्रुटि हो भन्ने विषयमा अनुसन्धानको माग गर्दै निर्वाचन समितिमा निवेदन दिएको जानकारी दिइन् । 

उनले मतपत्रमा अन्य उम्मेदवारहरूको परिचित नाममा नै उल्लेख गरिएको र आफ्नो भने टीका संग्रौला राखिएकाले षडयन्त्र भएको हुनसक्ने तर्क गरिन्  ।