काठमाडौँ – पहिलो मुख्य भूकम्पपछि भेनेजुएलामा २० भन्दा बढी पराकम्प गएका छन्, जसका कारण सर्वसाधारणहरू रातभर खुला सडकमा बस्न बाध्य भएका छन् । देशको उत्तरी तटीय क्षेत्र ला गुइरा, अरागुआ, काराबोबो र फाल्कोन भूकम्पबाट सबैभन्दा बढी प्रभावित भएका छन् ।

यसैबीच, अमेरिकी पूर्व राष्ट्रपति डोनाल्ड ट्रम्पले सामाजिक सञ्जाल ट्रुथ सोसलमा पोस्ट गर्दै भेनेजुएलाको भूकम्पलाई विनाशकारी भन्दै दुःख व्यक्त गरेका छन् । उनले लेखेका छन्, ‘भेनेजुएलामा गएका दुईवटा ठूला भूकम्पले ठूलो विनाश निम्त्याएको छ र ठूलो संख्यामा मानिसको ज्यान गएको छ । अमेरिका हाम्रा यी नयाँ र महान् साथीहरूलाई तत्काल सहयोग गर्न तयार र सक्षम छ र मैले सरकारी निकायलाई छिटो कदम चाल्न निर्देशन दिइसकेको छु ।

भेनेजुएलाको राजधानी काराकास र आसपासका क्षेत्रलाई केन्द्रविन्दु बनाएर बुधबार साँझ एकाएक दुईवटा शक्तिशाली भूकम्प गएका हुन् । केही सेकेन्डको अन्तरालमा गएका ७.२ र ७.५ म्याग्निच्युडका यी भूकम्पका कारण राजधानीका थुप्रै आवासीय भवन भत्किएका छन् भने ठूलो संख्यामा मानवीय क्षति भएको आशंका गरिएको छ ।

भूकम्पलगत्तै भेनेजुएलाकी कार्यवाहक राष्ट्रपति डेल्सी रोड्रिगेजले देशभर संकटकाल घोषणा गरेकी छन् । भूकम्पका कारण देशको मुख्य अन्तर्राष्ट्रिय विमानस्थलमा गम्भीर क्षति पुगेपछि विमानस्थल पूर्ण रूपमा बन्द गरिएको छ । अमेरिकी भूगर्भ सर्वेक्षण (यूएसजीएस) ले भूकम्पका कारण व्यापक क्षति भएको र हताहत हुनेको संख्या निकै उच्च हुन सक्ने चेतावनी दिएको छ ।

भेनेजुएलामा राष्ट्रिय बिदाको दिन परेकाले स्थानीय समयअनुसार साँझ भूकम्प जाँदा अधिकांश मानिस आफ्नै घरभित्र थिए । भूकम्पको धक्का छिमेकी देश कोलम्बियाको राजधानी बोगोटा र ब्राजिलसम्म समेत महसुस गरिएको थियो ।

कार्यवाहक राष्ट्रपति रोड्रिगेजले मृतकहरूको संख्या यकिन नगरे पनि ठूलो क्षति भएको स्वीकार्दै पीडित परिवारप्रति गम्भीर समवेदना प्रकट गरेकी छन् । भत्किएका भवनका भग्नावशेषभित्र पुरिएका मानिसको जीवितै उद्धारका लागि सुरक्षाकर्मी र उद्धार टोलीहरू तीव्र रूपमा परिचालन गरिएका छन् ।