काठमाडौं- वर्षौँदेखि जारी भ्रष्टाचार विरोधी कडा अनुसन्धान र शीर्ष कमाण्डरहरूको निरन्तर सफायाका कारण चिनियाँ सेनाको मनोबलमा निकै गिरावट आएको पाइएको छ। सन् १९२७ मा रेड आर्मीको रूपमा स्थापना भएदेखि गृहयुद्ध र कोरियाली युद्धमा प्रदर्शन गरेको वीरताको विरासत बोकेको जनमुक्ति सेनाभित्र अहिले डर र अनिश्चितताको वातावरण सिर्जना भएको रक्षा मामिलाका जानकारहरूले बताएका छन्।

चीनको सत्ताको मुख्य आधार मानिने सेनाभित्र बारम्बार भइरहेको शुद्धीकरण अभियानले नेतृत्वको स्थिरतालाई खलबल्याएको र आन्तरिक एकता कमजोर बनाएको विश्लेषण गरिएको छ। पछिल्ला वर्षहरूमा अभूतपूर्व संख्यामा वरिष्ठ अधिकारीहरू पदमुक्त भएका छन्। जसमा केन्द्रीय सैन्य आयोगका दुई उपाध्यक्ष र चीनको रणनीतिक रूपमा महत्त्वपूर्ण मानिने ‘रकेट फोर्स’ का धेरै कमाण्डरहरू समेत सामेल छन्।

यी कारबाहीहरूका कारण सैन्य अधिकारीहरूमाझ जोखिम मोल्न नचाहने र नयाँ पहलकदमी लिन डराउने प्रवृत्ति बढेको छ। धेरैजसो अधिकारीहरू पदोन्नति लिन समेत हिचकिचाउन थालेको स्रोतको दाबी छ। एक बहालवाला कर्णेलले नाम नबताउने सर्तमा भनेका छन्, “आधिकारिक रूपमा भ्रष्टाचार विरोधी अभियान भनिए पनि सेनाभित्र यो कारबाही अति नै भयो भन्ने भावना पलाएको छ, जसले गर्दा वरिष्ठ तहमा व्यापक असन्तुष्टि र निराशा छाएको छ।”

चिनियाँ राष्ट्रपति सी जिनपिङले केन्द्रीय सैन्य आयोगको अध्यक्षको रूपमा सेनामा आफ्नो नियन्त्रण अझ कडा बनाउँदै लगेका छन् । एरोस्पेस र मिसाइल फोर्स जस्ता रणनीतिक क्षेत्रका अधिकारीहरूमाथिको कारबाहीले यो अभियान तत्काल नरोकिने संकेत गरेको छ। विश्लेषकहरूका अनुसार निकट भविष्यमा सेनाको मनोबल थप खस्किन सक्ने र यसबाट चाँडै सुधार हुने सम्भावना न्यून रहेको छ।