काठमाडौं– सिन्धुलीस्थित इलाका प्रहरी कार्यालय खुर्कोटको हिरासतमा रहेका एक युवकको मृत्यु भएको घटनाको निष्पक्ष छानबिनको माग गर्दै काठमाडौंमा प्रदर्शन गरिएको छ ।

सुनकोशी गाउँपालिका–३, जुम्लीडाँडाका २३ वर्षीय श्रीकृष्ण विकको गत ७ वैशाखमा प्रहरी हिरासतमा मृत्यु भएपछि संयुक्त राजनीतिक दलित संघर्ष समितिको आयोजनामा शनिबार काठमाडौंको माइतीघरमा विरोध प्रदर्शन र धर्ना गरिएको हो । प्रदर्शनमा विभिन्न राजनीतिक दलका सांसद तथा नेताहरू पनि सहभागी भएका थिए ।

प्रदर्शनकारीहरूले दलित समुदायमाथि भइरहेका छुवाछुत, विभेद, बहिष्कार र दमन अन्त्य गर्न माग गर्दै ‘प्रहरी हिरासतमा मारिएका श्रीकृष्ण विकलाई न्याय दे’ लगायतका प्लेकार्ड प्रदर्शन गरेका थिए ।

श्रीकृष्ण विक खोटाङकी एक बालिकासँगको अन्तरजातीय प्रेम विवाहपछि उत्पन्न विवादका क्रममा बलात्कारको मुद्दामा पक्राउ परेका थिए । उनीमाथि झुटा मुद्दा लगाइएको भन्दै परिवार र अधिकारकर्मीहरूले घटनाको निष्पक्ष न्यायिक छानबिनको माग गर्दै आन्दोलन जारी राखेका छन् ।