काठमाडौँ– प्रतिनिधिसभाका स्वतन्त्र सांसद महावीर पुनले सांसदहरू जनताको सेवक भएको उल्लेख गर्दै पदको धाक र रवाफ देखाउने जनप्रतिनिधिलाई कडा कारबाही हुनुपर्ने बताएका छन्।

राष्ट्रिय स्वतन्त्र पार्टी (रास्वपा) का ओखलढुंगाबाट विजयी सांसद विश्वराज पोखरेलले एक विद्यालयका प्रधानाध्यापकलाई ‘गेटमा स्वागत गर्न नआएको’ भन्दै थर्काएको भिडियो सार्वजनिक भएपछि पुनले सामाजिक सञ्जालमार्फत यस्तो टिप्पणी गरेका हुन्।

सांसद पोखरेलको व्यवहारप्रति कडा आपत्ति जनाउँदै पुनले लेखेका छन्, ‘यिनी कुन पार्टीका हुन् कुन्नी ? म यिनको नेता भएको भए ठाउँको ठाउँ बर्खास्त गरेर घर जाने टिकट काटेर पठाउने थिएँ।’

उनले सांसद पदको गरिमालाई बुझ्न आग्रह समेत गरेका छन् । उनले थपेका छन्– ‘सांसद भनेको जनताको नोकर हो। एउटा सांसदले आफ्नो क्षेत्रका जनताले अह्राएको काम गर्नुपर्छ र ५ वर्षसम्म आफ्नो समय, बल र बुद्धि जनताको सेवामा लगाउनुपर्छ।’

बाटोमा स्वागत नगरेकै भरमा विद्यालयका प्रधानाध्यापकमाथि सार्वजनिक रूपमै रवाफ देखाउनुले सांसद पदकै बेइज्जत भएको पुनको ठहर छ । उनले यस विषयमा सम्बन्धित सांसदले आफ्नो अभद्र व्यवहारका लागि सार्वजनिक रूपमा क्षमायाचना गर्नुपर्ने बताएका छन् । यस्तै उनले माफी नमाग्ने हो भने जनताले त्यस्ता जनप्रतिनिधिलाई फिर्ता बोलाउनुपर्ने धारणा राखेका छन् ।

अहिले पनि सामाजिक सञ्जालमा उक्त भिडियो भाइरल भइरहेको छ । जसमा सांसद पोखरेलले आफूलाई स्वागत गर्न नआएको भन्दै प्रधानाध्यापकलाई हप्काइरहेको देखिन्छ ।