काठमाडौं- सर्वोच्च अदालतको आदेशपछि रिहा भएका बीएन्डसी मेडिकल कलेजका मालिक एवम् हिन्दु धर्म अभियन्ता दुर्गा प्रसाईंले नेपाली कांग्रेसकी नेतृ डा. आरजु राणासँगको फोटोबारे स्पष्टीकरण दिएका छन् ।

बुधबार जिल्ला प्रहरी परिसरबाट छुटेपछि उनले आरजु, नेता पूर्णबहादुर खड्कासहितको उक्त फोटो अढाई ववर्षअघिको भएको स्पष्टीकरण दिएका हुन् ।

‘अढाई वर्षअघि उहाँ परराष्ट्रमन्त्री भएका समयमा आरजु राणासँग भेट भएको हो । उहाँहरूले विदेशबाट युलियन्स स्कुलका लागि ल्याएको एफिलेशनबारे बुझ्न गएको थिएँ’, उनले भने, ‘अहिले आएर त्यो फोटो भाइरल गरेछन् । फोटो त प्रचण्ड, केपी, गिरिजाप्रसाद र प्रधानमन्त्री सुशीला कार्कीसँग पनि खिचेको छु । कसैसँग फोटो खिचेको कुराले कुनै मतलब राख्दैन ।’

तर केही सञ्चारमाध्यममा भने कांग्रेसका निवर्तमान सभापति देउवा पत्नी तथा कांग्रेस पूर्व केन्द्रीय सदस्य आरजु र प्रसाईंबीच चुनाव भाँड्ने योजनासहित भेट भएको जिकिर गरिएको थियो ।

फागुन २१ गते हुने प्रतिनिधि सभा सदस्य निर्वाचन भाँड्नका लागि राष्ट्र, राष्ट्रियता, धर्म संस्कृति र नागरिक बचाउ महाअभियानको संयोजक प्रसाईंसँग राणाले गोप्य भेट गरेको जिकिरसहित समाचार आएका थिए । उनीहरूलाई कांग्रेसकाा पूर्वकार्यावाहक सभापति पूर्णबहादुर खड्काले भेटाएको बताइएको थियो ।

ती समाचारमा माघ ८ गते खड्कालाई भेट्न प्रसाईं उनको निवास पुगेका बताइएको थियो । चार दिनपछि प्रसाईं र राणाको भेटको मिति तय भएको दाबी गरिएको थियो ।

८ माघमा भएको भेटमा प्रसाइँ पहेँलो कलरको मोजा देखिने गरि लगाएर पुगेको तस्विरमा देख्न सकिन्छ । २६ जनवरी अर्थात माघ १२ गते पुन खड्काकै निवासमा आरजु राणा र प्रसाइँबीच भेटवार्ता भएको थियो ।