काठमाडौं- सर्वोच्च अदालतको आदेशपछि रिहा भएका बीएन्डसी मेडिकल कलेजका मालिक एवम् हिन्दु धर्म अभियन्ता दुर्गा प्रसाईंले फेरि चुनावविरोधी अभिव्यक्ति दिएका छन् ।

सर्वोच्चले बन्दीप्रत्यक्षीकरणको रिट निवेदनमा मंगलबार सुनुवाइ गर्दै प्रसाईंलाई रिहा गर्न आदेश जारी गरेको थियो । बुधबार काठमाडौं प्रहरी परिसरबाट रिहा भएका उनले चुनावविरोधी कडा अभिव्यक्ति दिएका हुन् ।

निर्वाचन विथोल्नसक्ने भन्दै प्रहरीले उनलाई फागुन ४ गते प्रहरीले पक्राउ गरेको थियो। उनले सर्वोच्च अदालत, सिंहदरबार र संसद् भवन जलाइएको बताउँदै त्यति गरेर २०८४ को चुनाव ०८२ मा गर्न लागिएको दाबी गरे ।

‘संसद् भवन, सर्वोच्च अदालत, प्रहरी कार्यालय, सिंहदरबारदेखि स्वास्थ्य चौकीसमेत डढाएर के परिवर्तन आयो ? ०८४ को चुनाव ०८२ मै गर्न सिंहदरबारमा आगो लगाएको हो ? यो कुरा प्रष्ट नभइ तपाईंहरू किन चुनाव गराउनु हुन्छ ?’, उनले भने, ‘मैले बोल्दाखेरी थुनिनुपर्ने ? मैले यो कुरा पटक पटक बोलेको हो । सिंहदरबार र संसद् भवनमा आगो लाग्दा कोही पनि नबोल्ने अनि अहिले हतियार र बर्दी देखाएर चुनावमा जाने ?’

उनले पहिले संविधान संशोधन गर्नुपर्ने, सर्वदलीय बैठक बस्नुपर्ने, हिन्दु राज्य र राजसंस्था फर्काएर मात्रै चुनावमा जानुपर्ने बताए ।

‘सबै ठाउँमा आगो लगाएर खाली चुनावमा मात्रै जाने । नियमित चुनाव त ०८४ मै भइजान्थ्यो नि’, उनले भने, ‘२०५८ जेठ १९ गते राजारानीको हत्या गर्ने, २०६३ को आन्दोलन गराउने, नयाँ संविधानबाट गणतन्त्र ल्याउने र सिंहदरबारमा आगो ललगाउने एउटै समूह हो । अहिले त्यसैले चुनाव गराएर देशलाई युक्रेन बनाउँदैछ।’

उनले यही अवस्थामा यदि चुनाव भएमा नेपाल दोस्रो युक्रेन हुने दोहोर्‍याए । ‘यो चुनाव भयो भने देश दोस्रो युक्रेन हुन्छ । नेपाल अब युक्रेनको बाटोमा जाँदैछ’, उनले भने, ‘के लोकतन्त्रमा बोल्न पाइँदैन । मेरो कुरा मैले भन्न सक्छु।’

उनले मतदाताहरूलाई कुनै हालतमा भोट हाल्न नजाज अपील गरे। ‘तपाईंहरू चुनावमा नजानुस् । देश सक्ने विचार छ भने चुनावमा भोट हाल्नुस् । भात खाने जनता हो भने यो पटक चुनावमा भोट हाल्न जाँदैन’, उनले भने, ‘देश सक्ने चुनावमा गएर किन समय बर्बाद गर्नु हुन्छ ?’

भिडियोमा हेर्नुहोस् :