गौरीगञ्ज- झापा क्षेत्र नम्बर ५ स्थित गौरीगञ्जका बासिन्दाले नेकपा एमालेका अध्यक्ष केपी शर्मा ओलीसँग भेटेर विकासका योजना मागेका छन् ।

बुधबार गौरीगञ्ज गाउँपालिका-५ को श्यामाटोली पुगेका पूर्वप्रधानमन्त्री ओलीसँगको भेटमा उनीहरूले विगतदेखि नै एमालेलाई जिताउँदै आएको बताए । उनीहरूले यस पटक पनि जिताएरै छोड्ने धारणा सुनाए ।

स्थानीय होवोदेवी राजवंशीले भनिन्, ‘हामी त जुगदेखि एमाले हो । सूर्यबाहेक अन्त भोट हालेकै छैन । यस पटक पनि सूर्यमै हाल्ने हो ।’

उनले यस क्षेत्रमा बाटो विस्तार गरी बिजुलीको सेवा सहज बनाइदिन ओलीसमक्ष आग्रह गरिन् । यस्तै त्यही ठाउँका किरण गनगाईले बाटो, बिजुली केही नभएको ठाउँमा ओलीलेनै विकास गरेको भन्दै बाँकी विकासको जिम्मा लगाउन सूर्यमै भोट हाल्ने बताए ।

‘अरु कस्ले गर्छ र जिताउनु ?’ उनले भने, ‘जसले गर्छ, उसैलाई त हो भोट दिने ।’

रतुवा खोलाको तटबन्धन थप बलियो बनाउन जरुरी रहेको भन्दै अर्का स्थानीय सुकदेव सिंहले अब ओलीको जीतपछि यी काम पूरा हुने विश्वास व्यक्त गरे ।

सीमावर्ती गौरीगञ्जको उक्त गाउँमा पुग्दा एमाले अध्यक्ष ओलीलाई राजवंशी, सन्थाल लगायतका आदिवासी समुदायका स्थानीयले स्वागत गरे । महिलाहरूले ओलीसँग मातृभाषामा साक्षातकार गरे ।