काठमाडौं– कास्की जिल्लामा आगामी हुने स्थानीय निर्वाचनमा खटिने मतदान अधिकृत र सहायक मतदान अधिकृतहरूका लागी अभिमुखीकरण तालिम पोखरामा सुरु गरिएको छ ।  

उक्त अभिमुखीकरणमा १ सय ५३ मतदान स्थल र ३ सय ६३ मतदान केन्द्रका लागी खटिने ६ सय ८२ जना मतदान अधिकृत र सहायक मतदान अधिकृत सहभागी रहेका छन् ।

कास्कीका मुख्य निर्वाचन अधिकृत हिमलाल बेलवासेले कास्की जिल्लाको निर्वाचन प्रक्रियालाई महत्वका साथ हेरिएको भन्दै निर्वाचन लाई सुरक्षित र निष्पक्ष बनाउनका लागी सबै सरोकारवाला पक्षको महत्त्वपूर्ण जिम्मेवारी रहने बताए । उनले मतदान अधिकृत र सहायक मतदान अधिकृतहरूले इमानदारीताका साथ आफ्नो भूमिका पुरा गर्न आग्रह गरे । 

३ लाख ८ हजार ५ सय ७२ जना मतदाता रहेको कास्की जिल्लामा हुने प्रतिनिधि सभा सदस्य निर्वाचन लाई मर्यादित र व्यवस्थित बनाउनका सबैको भूमिका महत्त्वपूर्ण हुने कास्कीका प्रमुख जिल्ला अधिकारी रुद्रादेबी शर्माले बताइन् ।

कास्की जिल्लामा निर्वाचनका लागी १ सय ५३ मतदानस्थल र ३ सय ६३ वटा मतदान केन्द्र रहेका छन् । मतदान केन्द्रलाई अति संवेदनशील , केही संवेदनशील र केही सामान्य गरी वर्गीकरण गरिएसँगै पर्याप्त मात्रामा सुरक्षाकर्मीहरू परिचालन हुने हुँदा ढुक्क साथ मतदान गर्न सकिने जिल्ला प्रहरी कार्यालय कास्कीका प्रमुख नवीन कार्कीले बताएका छन्  ।