काठमाडौं- करिब चार वर्ष नेकपा एकीकृत समाजवादीमा रहेर गत कात्तिक २४ गते नेकपा एमालेमा फर्किएकी नेतृ रामकुमारी झाँक्री लुम्बिनी प्रदेशबाट राष्ट्रिय सभा सदस्यमा विजयी भएकी छन् ।

नेपाली कांग्रेस र नेकपा एमालेबीच गठबन्धन भएकाले उनी आइतबार भएको राष्ट्रिय सभा निर्वाचनमा सजिलै विजयी भएकी हुन् ।

चार वर्षपछि संसद् यात्रा गर्ने क्रममा झाँक्रीले ६ हजार ३ सय ३ मतभार पाइन् । लुम्बिनीबाट लुम्बिनीबाट तीनै सीटमा कांग्रेस-एमाले गठबन्धनले जित निकालेको छ।

महिला कोटामा झाँक्री विजयी हुँदा अपांगतात कोटामा कांग्रेसका वासुदेव घिमिरे ‘जंगली’ले राष्ट्रिय सभाको यात्रा तय गरे । उनले उनले ५ हजार ३ सय २२ मतभार पाए ।

अन्य कोटाबाट कांग्रेसकै चन्द्रबहादुर केसी निर्वाचित भए । उनी ५ हजार ९७७ मतभारसहित विजयी भए ।

एमाले अध्यक्ष केपी शर्मा ओलीले विगतमा पार्टी निर्माण र विस्तारमा सघाएका तर बीचमा अन्य दलतर्फ गएका नेताहरूलाई पुनः एमालेमा फर्कन आह्वान गरेअनुसार उनले एमालेमै यात्रा थालेकी थिइन् ।

माधवकुमार नेपालले माओवादी केन्द्रलगायत दलसँग एकता गरेपछि झाँक्री असन्तुष्ट थिइन्। चार वर्षअघि एमाले छाड्दा प्रतिनिधसभाकी सांसद रहेकी झाँक्रीलाई संसद्मा फर्किन एमालेकै सहारा लिनुपरेको हो ।