काठमाडौं- राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र साहले फागुन २१ को निर्वाचनबाट पार्टीले स्पष्ट बहुमत ल्याउने बताएका छन् ।

झापा क्षेत्र नम्बर ५ सहित कोशी प्रदेशका विभिन्न जिल्ला घुमेर आएका उनले आइतबार ललितपुरको ज्वागलस्थित सहयोगी कुमार बनेको घरमा बसेर रास्वपाका उम्मेदवारहरूलाई भेट्दै यस्तो बताएका हुन् ।

प्रतिनिधि सभा सदस्य निर्वाचनको तयारी र रणनीतिबारे छलफललका क्रममा साहले यसपालीको चुनावमा रास्वपाले स्पष्ट बहुमत ल्याएर सरकार बनाउने बताएका हुन् ।

उक्त भेटपछि सञ्चारकर्मीसँग कुराकानीका क्रममा ललितपुर क्षेत्र नम्बर ३ की उम्मेदवार डा. तोसिमा कार्कीले बालेन्द्रसँगको भेटमा चुनावी अभियान र रणनीतिबारे कुरा भएको बताइन् ।

साहले रास्वपाका उम्मेदवारहरूलाई स्पष्ट बहुमतको सरकार बन्ने विश्वास दिलाएका हुन् । उनले त्यसका लागि मतदाताको घरघरमा पुगेर समस्या बुझ्न पनि भनेका छन् ।

उक्त भेटमा साहले उम्मेदवारहरूसँग चुनावी अभियानको प्रगति र अवस्थाबारेको ब्रिफिङ पनि लिएका रास्वपाका नेताहरूले जानकारी दिएका छन् ।

कार्कीका अनुसार चुनावी अभियानको जानकारी लिएका साहले रणनीतिबारे पनि छलफल गरे। ‘हाम्रो सरकार बन्दैछ। ढुक्क भएर मतदाताको घर–घरमा जानुस्’, साहको भनाइबारे कार्कीले पत्रकारहरूलाई भनिन्, ‘मतदाताका समस्या सुनेर समाधान उपायबारे कुरा गरौँला, यस पटक हामी स्पष्ट बहुमतको सरकार बनाउँछौँ।’

उता काठमाडौं १ की उम्मेदवार रञ्जु दर्शनाले भेटमा चुनावी रणनीतिबारे कुरा भएको बताइन् । बालेन्द्रले ढुक्कसँग चुनावी अभियान अगाडि बढाउन भनेको पनि उनले सुनाइन् ।

आगामी फागुन २१ गते हुने प्रतिनिधि सभा निर्वाचनका लागि रास्वपाका बालेन्द्रले झापा–५ बाट उम्मेदवारी दिएका छन्। जहाँ उनले नेकपा एमालेका अध्यक्ष केपी शर्मा ओलीलाई टक्कर दिँदैछन् ।