तेहरान– इरानले इराकको कुर्दिस्तान क्षेत्रमा रहेका इरानी कुर्द विपक्षी समूहका शिविरलाई लक्षित गरी ड्रोन आक्रमण गरेको छ ।

तेहरानस्थित मेहर समाचार एजेन्सीका अनुसार इस्लामिक रिभोलुसनरी गार्ड कोर (आईआरजीसी) को स्थल सेनाले शनिबार राति बालिसान क्षेत्रमा रहेको कोमाला समूहको मुख्यालयलाई लक्षित गरी ड्रोन आक्रमण गरेको हो ।

इरानले कोमालासहितका इरानी कुर्द विपक्षी समूहलाई आतङ्कवादी तथा पृथकतावादी सङ्गठनका रूपमा लिँदै आएको छ । इराकको अर्धस्वायत्त कुर्दिस्तान क्षेत्रमा इरानी कुर्द विपक्षी लडाकु समूहका विभिन्न शिविर तथा आधार रहेका छन् ।

मध्यपूर्वमा फेब्रुअरीमा द्वन्द्व सुरु भएयता इरानले यी समूहका शिविरलाई पटकपटक निशाना बनाउँदै आएको छ । तेहरानले इरानी कुर्द लडाकु समूहलाई आफ्नो कट्टर शत्रु इजरायलको समर्थन प्राप्त रहेको आरोपसमेत लगाउँदै आएको छ ।

यद्यपि, पछिल्लो ड्रोन आक्रमणबारे आईआरजीसीले तत्काल आधिकारिक रूपमा जिम्मेवारी लिएको छैन ।

यस क्षेत्रमा भएका पछिल्ला आक्रमणमध्ये सबैभन्दा घातक घटनामा गत जुलाई १७ मा सुलेमानिया सहरनजिक कोमाला समूहका नौ सदस्य मारिएका थिए ।