काठमाडौँ– महँगी, आर्थिक असमानता र सरकारको नीतिविरुद्ध फ्रान्समा शनिबार भएको पछिल्लो प्रदर्शनका क्रममा विभिन्न सहरमा झडप भएको छ ।

दिनभर शान्तिपूर्ण रूपमा चलेको प्रदर्शन साँझतिर उग्र बनेपछि पेरिस लगायतका शहरहरूमा भीडलाई तितरबितर पार्न प्रहरीले अश्रुग्यास र पानीको फोहोरा प्रहार गरेको थियो । फ्रान्सको गृहमन्त्रालयका अनुसार प्रदर्शनका क्रममा करिब एक हजार मानिस पक्राउ परेका छन् । दुईजना गम्भीर घाइते भएका छन् ।

स्थिति नियन्त्रणमा लिन संगठित अपराध र आतंकवादविरुद्ध खटिने विशेष कुमुक टोली समेत परिचालन गरिएको थियो। केही नकावधारी युवाहरूले कार सोरुमका सिसाहरू फुटाएपछि प्रहरीले लाठीचार्ज गरेको थियो।

राजधानी पेरिस, मार्सेई, लियोँ र बोर्डोलगायत सहरमा प्रदर्शन हिंसात्मक बनेको थियो । मार्सेलीमा बाटो छेक्न सडकका ब्यारिकेडहरूमा आगो लगाइएको थियो भने बोर्डोमा प्रदर्शनकारीहरूले पसलहरूका काठका फल्याकहरू निकालेका थिए ।

मन्त्रालयका अनुसार शनिबार देशभर करिब चार लाख १० हजार मानिस प्रदर्शनमा उत्रिएका थिए । यता, मजदुर सङ्गठनहरूले भने करिब आठ लाख मानिस प्रदर्शनमा उत्रिएको दाबी गरेका छन् ।

सम्भावित हिंसा रोक्न देशभर करिब ७० हजार प्रहरी खटाइएको थियो। राष्ट्रपति इम्यानुएल म्याक्रोनले मान्यता प्राप्त ट्रेड युनियनहरूले आयोजना गरेका प्रदर्शनलाई मात्र अनुमति दिइने घोषणा गरेका थिए ।

सडकमा उत्रिएका प्रदर्शनकारीहरूले सरकारको नीतिका कारण जनताले सास्ती भोग्नु परेको र महंगीका कारण जीवनयापन कष्टकर बनेको बताएका छन्।

गत साताको हिंसा फ्रान्सको आधुनिक इतिहासकै सबैभन्दा खराब अशान्तिको रूपमा हेरिएको थियो । उक्त घटनामा फ्रान्सभर दुई हजारभन्दा बढी पसल तथा व्यवसाय प्रत्यक्ष प्रभावित भएका थिए । वाणिज्य तथा उद्योग सङ्घका अनुसार क्षति सयौँ मिलियन युरो बराबर पुगेको अनुमान छ । घटनामा करिब एक हजार प्रहरी घाइते भएका थिए ।