इस्लामावाद- पाकिस्तानका पूर्वप्रधानमन्त्री इमरान खानका छोरा कासिम खानले पाकिस्तान तहरीक–ए–इन्साफ (पिटिआई) ले सेप्टेम्बर २७ मा आयोजना गर्ने विरोध प्रदर्शनका क्रममा अडियाला जेलतर्फ मार्च नगर्न समर्थकहरूलाई आग्रह गरेका छन् ।

कासिमले जेलतर्फ हुने प्रदर्शनलाई आधार बनाएर ‘प्रतिआक्रमण’ हुनसक्ने र त्यसबाट आफ्ना बुबाको जीवन जोखिममा पर्न सक्ने चेतावनी दिएका हुन् ।

सामाजिक सञ्जाल एक्समार्फत उनले जेलनजिक पदयात्रा वा प्रदर्शन नगर्न आफूलाई निर्देशन दिइएको बताउँदै विरोधका क्रममा आफ्ना बुबासँग कुनै ‘दुर्घटना’ हुने अवस्था सिर्जना नगर्न आग्रह गरेका छन् ।

इमरान खान सन् २०२३ को अगस्टदेखि विभिन्न मुद्दामा दोषी ठहरिएपछि जेलमा रहेका छन् ।

यसैबीच, पिटिआईको प्रदर्शनलाई ध्यानमा राख्दै पाकिस्तानको पञ्जाब प्रान्तमा सुरक्षा व्यवस्था कडा पारिएको छ। प्रान्तीय सरकारले सेप्टेम्बर २३ देखि अक्टोबर ५ सम्म धारा १४४ लागू गर्दै पाँच वा सोभन्दा बढी मानिस भेला हुन प्रतिबन्ध लगाएको छ।

रावलपिन्डी, अटक, झेलम र मियाँवालीमा पाकिस्तानी रेन्जर्स परिचालन गर्नसमेत माग गरिएको छ। प्रान्तीय सरकारले जारी गरेको सूचनामा आतङ्कवादी सङ्गठन तथा शत्रुतापूर्ण गुप्तचर निकायबाट सार्वजनिक शान्ति र सुरक्षामा ‘गम्भीर र आसन्न खतरा’ रहेको उल्लेख गरिएको छ।

प्रदर्शनको तयारीसँगै इमरानका बहिनीहरू अलीमा, उज्मा र नोरीनको हिरासतको विषय पनि चर्चामा छ। उज्मा र नोरीनलाई ३० दिनका लागि हिरासतमा राखिएको छ। उनीहरूको नजरबन्द आदेश तत्काल निलम्बन गर्न लाहोर उच्च अदालतले अस्वीकार गर्दै सम्बन्धित अधिकारीसँग जवाफ मागेको छ।

पाकिस्तानी अधिकारीहरूले प्रदर्शनअघि लगाइएका प्रतिबन्धलाई सार्वजनिक व्यवस्था र सुरक्षा कायम गर्ने उपायका रूपमा व्याख्या गरेका छन्।