काठमाडौं– नेपालका विभिन्न विद्यालय, स्वास्थ्य केन्द्र, बौद्ध गुम्बा तथा हिमाली क्षेत्रका बालबालिकाको शिक्षा र उत्थानमा सहयोग गर्दै आएको इनलाइट इन्टरनेसनलले काठमाडौंका एक विद्यालय र स्वास्थ्य केन्द्रलाई आर्थिक सहयोग गरेको छ।

अमेरिकामा बस्दै आएकी चिनियाँ महिला छिओङ यिङचोमाको नेतृत्वमा रहेको इनलाइटले छेत्रपाटी निःशुल्क चिकित्सालयमा सञ्चालित मिर्गौला डायलाइसिस केन्द्र र आर्यतारा विद्यालयलाई सहयोग उपलब्ध गराएको हो।

संस्थाका अध्यक्ष, सदस्य तथा सहयोगीहरूको टोलीले प्रसिद्ध नेपाली बौद्ध भिक्षुणी तथा गायिका आनी छोइङ डोल्माद्वारा स्थापित आरोग्य फाउन्डेसनको सहयोगमा सञ्चालित डायलाइसिस केन्द्र र आर्यतारा विद्यालयको भ्रमण गरी सहयोग हस्तान्तरण गरेको थियो।

टोलीले डायलाइसिस केन्द्रलाई आर्थिक सहयोग गर्नुका साथै उपचाररत बिरामीलाई कपडासमेत वितरण गरेको जनाइएको छ। इनलाइटले आगामी दिनमा नेपालमा सार्वजनिक स्वास्थ्य प्रणालीको विकासमा सहयोग गर्ने तथा विशेषगरी महिला बिरामी, विपन्न र जोखिममा रहेका समुदायलाई प्राथमिकतामा राख्ने जनाएको छ।

विपन्न परिवारका बालिकालाई शिक्षाको अवसर र सहयोगी वातावरण प्रदान गर्दै आएको आर्यतारा विद्यालयलाई पछिल्लो पटक करिब ७ लाख रुपैयाँ सहयोग गरिएको संस्थाले जनाएको छ।

इनलाइटले नेपालका विभिन्न शैक्षिक तथा परोपकारी संस्था र समुदायलाई निरन्तर सहयोग गर्दै आएको छ। हालसम्म लुम्बिनी बौद्ध विश्वविद्यालय, लुम्बिनीस्थित विश्व शान्ति स्तूप, आर्यतारा विद्यालय, मिङ्युर रिन्पोछेको हिमाली बालविहार, छोक्नी रिन्पोछेको भिक्षुणी विद्यालय तथा शाब्तेन तेन्जिन रिन्पोछेका गुम्बा र भिक्षुणी समुदायले संस्थाबाट सहयोग प्राप्त गरेका छन्।

त्यसैगरी, नेपालको दुर्गम हिमाली क्षेत्रका विपन्न बालबालिकासँग सम्बन्धित संस्थाहरूलाई समेत इनलाइटले सहयोग गर्दै आएको जनाएको छ।

संस्थाका अनुसार नेपालमा प्रदान गरिने सहयोग चीन, अमेरिका लगायत विभिन्न देशका व्यवसायी तथा सहृदयी व्यक्तिहरूबाट संकलन गरिएको रकमबाट व्यवस्थापन हुँदै आएको छ।