काठमाडौं– सरकारको अकर्मण्यताका कारण पछिल्लो समय सडकमा अराजकता बढ्दै गएको छ।

त्यही अराजकताको शिकार मंगलबार काठमाडौंको व्यस्त सडकमा एकजना महिला ट्राफिक प्रहरी कुटिएकी छन्।

काठमाडौंको नयाँ बानेश्वर चोकमा ड्युटीरत एकजना महिला ट्राफिक प्रहरी जवानलाई जुम्लाका २७ वर्षीय युवक राज कठायतले हातपात गरेका हुन्। महिला ट्राफिक प्रहरीलाई आक्रमण गर्ने ती युवकलाई प्रहरीले हिरासतमा लिएको छ।

मंगलबार बिहान काठमाडौं महानगरपालिका-१० स्थित पुरानो संसद् भवन नजिकै जुम्लाको तातोपानी घर भएका २७ वर्षीय कठायतले महिला ट्राफिक प्रहरीलाई आक्रमण गरेका हुन् ।

सडकमा ड्युटीरत प्रहरीलाई कुटेपछि उनलाई पक्राउ गरिएको जिल्ला प्रहरी परिसर काठमाडौंका एसपी दानबहादुर थापाले बताए ।

प्रहरीका अनुसार बानेश्वर चोकस्थित आकाशेपुलबाट बाटो काट्न आग्रह गर्दा कठायतले महिला प्रहरीसँग विवाद गर्दै आक्रमण गरेका थिए । कठायतलाई हिरासतमा लिएर घटनाबारे प्रहरी वृत्त नयाँ बानेश्वरले अनुसन्धान गरिरहेको छ।